Ró Maasdam.

DILI, (TATOLI) – Turista husi Izraél ho naran Michael Bernstein, iha nia vizita dahuluk mai Timor-Leste ho ró Maasdam ne’ebé tula pasajeiru hamutuk 1.700 hatete bainhira ho ró hateke mai país ne’e, Timór Illa ida bonita.

“Ami husi dook bainhira hateke mai Timór ne’e illa ida ne’ebé bonita maibé seidauk hatene klaru kona-ba illa ida ne’e”, Bersntein dehan ohin bainhira sama ain dahuluk iha Portu Dili hodi hein atu hala’o nia vizita bá fatin turístiku sira iha país ne’e.

Izraelianu ne’e hatete ba dahuluk hatene Timor-Leste liuhusi internét, google, nomós ho ró ne’ebé maka hanesan nia pakote husi Austrália no sei liuhusi Timór iha oras hitu ho balun nia laran ne’e no husi nia pakote ne’e sei lori atu hatene uitoan Timór no bainhira husik Timór sei hatene liután país ne’e.

“Ami hameno tiha ona pakote ho kompañia (ajénsia turizmu) depois sira mak sei lori ami hale’u uitoan Timór bainhira hotu ba maka foin bele hatete saida maka ami gosta no lagosta husi ida ne’e liuliu koñesimentu kona-ba Timór”, katak nia antes atu vizita sítiu turístiku sira.

Iha inísiu tinan ne’e, Timor-Leste ba daruak ona simu vizita husi ró kruzeiru rua mak maka Seabourn ne’ebé lori pasajeiru hamutuk 450 iha semana kotuk (8/1) hodi vizita fatin turístiku sira besik kapitál no iha 16 janeiru ne’e mai tan ró Maasdam ho volume turista 1.700.

Diretór Jerál Turizmu Ministériu Turizmu, Komérsiu no Indústria (MTKI), José Filipe Dias Quintas, hatete iha inísiu tinan ne’e Timor-Leste hetan vizita husi ró kruzeiru rua no ida ne’e sinál ida di’ak tebes.

“Ita haree iha samana kotuk ne’e nia númeru ki’ik 450, maibé ohin sa’e fali 1.700 signifika nia númeru komesa sa’e”.

Ró Maasdam ne’ebé to’o iha Dili iha tuku hitu dadeer no pasajeiru sira tun kuaze besik tuku sia ne’e halo kedan atividade vizita bá Likisá, Ermera no balun pasiar iha sítiu turístiku iha Dili laran mak Kristu Rei no Muzeu Rezisténsia no seluk tan.

Quinta informa turista sira ne’e mai husi Austrália, Europa maka hanesan Alemaña, España, Fransa no nasaun seluk no ró ne’e mai husi Austrália no sei iha Timor-Leste durante oras ualu nia laran hafoin kontinua viajen ba illa Komodo, Indonézia no bá nasaun sira seluk.

“Husi aspetu seguransa di’ak tebes, husi PNTL fó seguransa másima nomós haree husi perspetiva Ministériu Turizmu nian katak ita haree husi aspetu promosaun nian di’ak tebes tanba sira mai situasaun ida hakmatek signifika sira fila bele hatutan fali ba família sira para bá oin sira mós bele mai vizita Timór”.

Timor-Leste Presiza Hadi’a Infraestrutura Bázika

Diretór Jerál Turizmu Ministériu Turizmu, Komérsiu no Indústria (MTKI), José Filipe Dias Quintas, hatete tanba volume ró kruzeiru ne’ebé sei mai país ne’e aumenta maka Timor-Leste presiza hadi’a nia infraestrutura bázika sira liuliu sintina.

“Ita iha ona terminál pasajeiru iha portu Dili, tempu Indonézia nian, ha’u sente osan sira be tama liuhusi vistu sira ne’e ita bele gasta uitoan ba reabilitasaun liuliu sintina, bee, para pasajeiru sira mai sente konfortavel tanba daudaun ne’e sintina mós laiha, ne’ebé ba oin sei halo koordenasaun nafatin ho autoridade Portu Dili, ami fó apoiu másimu para oinsá bele halo reabilitasaun ba terminál liuliu ba pasajeiru tanba ami rona ona informasaun sira tau ona orsamentu uitoan ba iha terminál ne’e para reabilita sintina sira ne’e”.

Tanba tuir koordenasaun Ministériu Turizmu Komérsiu no Indústria ho ajénsia ró sira fó informasaun katak iha tinan ne’e nia laran ró sei mai barak liután.

“Tanba ne’e maka buat vantajen ba Timor-Leste mak nu’udar destinu turístiku ida joven liu iha Ázia no Pasífiku, ita bolu destinu turístiku ida emerjente signifika destinu turístiku ne’ebé ema hakarak vizita’.

Entantu atu responde ba merkadu tenke investe iha infraestrutura no rekursu umanu para bele kompete ho destinu turístiku iha rai sira seluk iha Ázia no Pasífiku.

Ba dauduan ne’e vizita turista sira bá de’it fatin sira ne’ebé besik maka Diretór Jerál ne’e hatete bainhira asesu di’ak liuliu estrada maka pasajeiru sira mós hakarak pasiar to’o munisípiu sira besik, maibé tanba dalan seidauk di’ak maka labele to’o fatin sira ne’e.

“Normalmente sira mai oras ualu, maibé lataka dalan iha futuru sira mós bele mai iha ne’e to’o loron rua ka tolu tanba depende ba infraestrura, kuandu infraestrutra di’ak, ita-nia portu di’ak sira mós para to’o loron rua tolu hanesan mós nasaun sira seluk, maibé bá oin ita bele atrai ró sira bele mai para loron tolu, haat ka lima iha ne’e para sira bele gasta osan barak liután”.

“Ezemplu ida, se dalan ba Manatutu kapa’as, ha’u sente pasajeiru sira mós hakarak pasiar to’o Manatutu, se dalan ne’e di’ak lato’o oras rua ita to’o tanba ró ne’e oras ualu iha ne’e, karik maka dalan liga bá munisípiu sira besik di’ak, ha’u sente munisípiu sira mós bele hetan benefísiu ekonómiku. Agora ne’e tansá maka bá de’it Likisá, Ermera tanba asesu di’ak, sira bá lato’o oras rua sira to’o, entaun ami mós sei tenta serbisu hamutuk ho ministériu relevante para sítiu turístiku ne’ebé potensiál tebes ita mós haree ba nia infraestrutura tanba sai xave importante ba dezenvolvimentu turizmu iha Timor-Leste”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here