Sekretáriu Estadu ba Protesaun Sivíl, Alexandrino Xavier de Araújo. Imajen/António Goncalves

DILI, (TATOLI) – Sekretáriu Estadu ba Protesaun Sivíl, Alexandrino de Araújo, hatete governu preparadu hodi atende família vitima dezastra naturál ne’ebé akontese ona no ba futuru.

Nia dehan polítika governu da-ualu ne’e bainhira halo enkontru ho liña ministeriál, kompostu hosi Ministériu Obras Públikas, Ministériu Administrasaun Estatál, Ministériu Finansa, Ministériu Solidaridade Sosiál no Inkluzaun (MSSI), Servisu Nasionál Intelejénsia, Prezidente Autoridade Munisípiu Baukau, Administradór Vikeke no Lautein iha Palasiu Governu, ohin.

Tuir dadus família uma kain 400 resin hosi munisípiu tolu Baukau, Vikeke no Lautein maka afeita dezastre durante dezembru 2018 to’o inisu janeiru.

Enkuantu oras ne’e governu kontaktu hela pontu fokál MSSI hosi munisípiu Ermera, Kovalima no seluk hodi rellata dadus hodi hetan apoiu emerjénsia no rekuperasaun ba materiál konstrusaun uma.

“Dezastre ne’e ita bele apoiu ohin maibé ohin bele akontese foun tan maibé em prinsípiu governu preparadu hodi fó asisténsia ba ita nia populasaun ne’ebé afeita ba dezastre”, katak tan.

Governnu liuhosi MSSI oras ne’e fó ona apoiu emerjénsia ba família afeitadu hodi kontinua ho apoiu materiál konstrusaun.

Iha biban hanesan, Prezidente Autoridade Munisípiu Baukau, António Agostu Guterres, hateten ohin enkontru ho Primeiru-Ministru hodi relata kona-ba dezastre naturál ne’ebé akontese iha 26 dezembru 2018 to’o inisiu janeiru 2019 hamutuk 500 resin maibé rezultadu verifikasaun rezulta uma kain 323 maka afeitadu, uma kain 40 resin hetan ona apoiu iha munisípiu Baukau.

Agora ekipa dezastre munisipál nian kontinua atende ba apoiu emerjénsia, fó mina, foos, lona. Enkuantu rekuperasaun dadus submete mai MSSI hodi fó apoiu kalen, pregu, simentu no badaen, maibé bazea ba estragus todan, naton no kmaan”, tenik Prezidente Autoridade.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here