Ministra Edukasaun Juventude no Desportu (MEJD), Dulce de Jesus Soares. Imajen/ Fundasaun Alola

DILI, (TATOLI) – Ministériu Edukasaun, Juventude no Desportu (MEJD) planeia atu kompletu infrastrutura estabelesimentu ensinu sira iha Timor-Leste (TL) laran tomak, iha 2020.

“Ami iha mehi boot ida katak 2020, ministériu edukasaun sei kompleta infrastrutura. Tanba ne’e mak 2019 ami tenke serbisu maka’as atu prepara ami-nia planu ba 2020”, dehan Ministra Edukasaun, Dulce de Jesus Soares, ba jornalista sira iha edifísiu MEJD Vila Verde, ohin.

Governante ne’e mós katak bainhira laiha dezastre naturál, eskola sira iha teritóriu presiza sala aula rihun ida resin. Iha 2017, 2018, iha eskola 82 mak hetan dezastre naturál.

“Dezembru nia laran ne’e iha eskola 10 resin mak hetan ona impaktu husi dezastre naturál maibé ami-nia tékniku sira halo levantamentu informasaun, fó apoiu emerjente balun ba eskola sira ne’ebé mak bele halo lalais, nune’e iha ano létivu foun estudante sira bele kontinua fali sira-nia eskola”, katak.

Ministra relata eskola sira ne’ebé hetan impaktu husi dezastre naturál MEJD identifika ona mak iha munisípiu Baukau, eskola ida iha Abafala, Namanei, Afaça, no iha tan fatin seluk. Iha mós Kovalima, Manufahe, Ainaru.

Enkuantu tuir planu programa governu mak halakon obstákulu iha asesu edukasaun no asegura atu labarik no foin sa’e sira bele asesu ba edukasaun ida ho kualidade, la haree ba kondisaun ekonómika no sosiál nomós fatin iha ne´ebe sira horik ba, sai nu’udar estratéjia prioritária ba Governu.

Edukasaun nu’udar direitu fundamentál ida ba sidadaun no sai instrumentu importante ba dezenvolvimentu sosiál no ekonómiku, nune’e mós atu kria sosiedade ida ne´ebé saudável no próspera.

Iha tinan 2023, Timor Leste hakarak atu atinje edukasaun ida ho kualidade ho oportunidade boot iha asesu ba ema hotu, hodi sai edukasaun ida ne’ebé bele hatán loloos ba nesesidade merkadu traballu nian, kontribui hodi hamenus dezempregu, liuhusi aprendizajeniha moris tomak (aprendizagem ao longo da vida), no, liu-liu, atu hakotu tiha siklu visiozu husi/iha ki’ak interjerasionál.

Haktuir mós ba iha planu Estratéjiku Dezenvolvimentu Nasionál (PEDN), 2011-2030 no konsagra mós iha konstituisaun Repúblika Demokrátika Timor-Leste (RDTL), artigu 59o (Edukasaun no Kultura).

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here