Deputadu Partidu Demokrátiku, Adriano do Nascimento. Imajen António Goncalves

DILI (TATOLI)–Deputadu Parlamentu Nasionál (PN) hosi Bankada CNRT ho Partidu Demokrátiku (PD) preokupa ho sistema ATM (automated teller machine/) Banku Nasionál Komérsiu Timor-Leste (BNCTL-Sigla Portugés).

Vise Xefe Bankada Partidu Demokrátiku (PD), Adriano do Nascimento, levanta atendimentu Banku Nasionál Komérsiu Timor-Leste ladún efetivu, iha loron ferias.

“Ha’u hanesan kliente ida mós reklama kona-ba ATM, tanba kuandu ita pasa ferias, ATM mós ferias, kuandu udan mai ATM mós paradu,” Deputadu Adriano Nascimento reklama iha Nia intervensaun ba plenária parlamentu nasionál nian, ohin.

Adriano husu ba parte kompetente atu toma atensaun atu bele koordena ho BNCTL  hodi hadi’ak sira nia servisu no atendimentu liu-liu sistema ATM.

Nia sujere se service internet mak la di’ak bele intensifika fali, atu bele fó atendimentu ne’ebé di’ak ba kliente. Tuir nia banku tenke motiva ema, labele dezmoraliza fali kliente, atu nune’e timoroan sira hadomi nafatin nia banku, sé lae ema bele halai hotu ba banku estranjeiru nian kuandu atendimentu di’ak liu.

Entretantu, Deputadu Partidu CNRT, Patrocínio Fernandez, reforsa katak atendimentu BNCTL nian kona-ba ATM, kuandu ita ferias sistema la funsiona. Aleinde ida ne’e mós funsionáriu sira atu ba atende kliente mós baruk, nune’e mós kliente sira telefone mós dala barak funsionáriu sira la atende.

Entretantu to’o notísia ne’e tuun, seidauk hetan konfirmasaun hosi Governadór BNCTL.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here