DILI (TATOLI)-Organizasaun Mundiál Saúde (OMS) ho Autoridade Inspesaun no Fiskalizsaun Atividade Ekonómika no Sanitária (AIFAESA) organiza seminaríu advokasia ba funsionáriu Ministériu Solidariedade Sosiál no Inkluzaun (MSSI) kona-ba implementasaun dekretu lei nú. 14/2016, rejime kontrolu nasionál tabaku aliña ho kuadru konvensaun kontrolu tabaku nian.
Koordenadór AIFAESA, Abílio Oliveira Sereno, hatete OMS preokupa saúde ema hotu nian iha mundu, tanba haree katak tabaku prejudika mundialmente ho moras maka’as ba saúde.
“Tanba ne’e maka kuandu mosu dekretu lei 14 ne’ebé regula kontrolu tabaku, sira haree katak bele hamutuk ho AIFAESA ho autoridade sira seluk, Ministériu Saúde rasik, autór prinsipal ba dekretu lei ne’e hamutuk ho ministériu ne’e (MSSI) tanba sira haree husi ministériu hotu-hotu iha ne’e maka reprezenta liu funsionáriu ne’ebé fuma tabaku, para esplika didi’ak kona-ba utilizasaun fa’an tabaku iha Timór”, Abílio dehan iha edifísiu MSSI Kaikoli ohin iha ámbitu semináriu ne’e.
Atu esplika didi’ak sobre tabaku tanba komérsiu ne’e tenke halo didi’ak, la’ós kontra tabaku, maibé komesa 6 novembru 2018 bá oin atu halo komérsiu tabaku tenke tuir regra ona, labele fa’an tuir hakarak”.
“Tanba iha dekretu ne’e hatete fa’an tabaku nia emblema tenke hakerek tetun ho portugés, nikotina hira iha dekretu lei hatete, depois fa’an iha ne’ebé, espasu balun ne’ebé dekretu lei hatete labele fuma hanesan iha fatin sira serbisu, restaurante no kuandu kontra iha sansaun”.
Tanba ne’e AIFAESA tenke hamutuk ho operadór ekonómika sira para esplika didi’ak hodi labele monu iha infrasaun.
Diretór Nasionál ba Asisténsia Sosiál MSSI, Mateus da Silva, hatete nesesáriu tebes fahe informasaun kontrolu tabaku nian tanba haree katak oinsá maka ema sira fa’an tabaku ne’e ba ema ida ne’ebé bele atu sosa.
“Konsumidór sira mós bainhira fuma tabaku iha ne’ebé. Ita ne’e dalaruma iha festa ruma ema barak ita fuma no tuir esplikasaun ema barak mate la’ós ida fuma, maibé horon fali husi ema seluk entaun impaktu negativu husi konsumidór tabaku ne’e boot liu ba ema lafuma”.
Tanba ne’e kona-ba kontrolu tabaku ne’e liuliu ema sira iha MSSI hanoin ona fatin atu fuma iha ne’ebé, komesa hanoin ekonomia uitoan atubele poupa osan sosa hahán ou buat ne’ebé nesesáriu tebes ba família duké sunu sigarru ka osan.
Tuir dekretu lei númeru 14/2016 broibe ema atu fuma iha resintu públiku ne’ebé naktaka, lokál serbisu no transporte públiku, mas espasu atu fuma maka iha fatin livre.
Iha ámbitu semináriu ne’e MSSI mós halo lansamentu ba kuadru labele fuma sigarru ne’ebé hatete iha fatin ne’e bandu fuma.
Lee mós dekretu lei 4/2016 : http://www.mj.gov.tl/jornal/public/docs/2016/serie_1/SERIE_I_NO_22.pdf
Jornalista : Maria Auxiliadora
Editór : Manuel Pinto
