MALIANA (TATOLI)—Bispu Dioseze Maliana, Don Norberto Amaral, hateten mídia atu halo serbisu ho di’ak tenke iha infraestrutura ne’ebé di’ak.
Relativa ho edifísiu Rádiu Televizaun Timor-Leste (RTTL), Bispu haktuir, bainhira haree hosi liur kondisaun edifísiu RTTL ne’e át teb-tebes, ne’e duni husu Governu atu hadi’a edifísiu mídia Estadu refere.
“Kondisaun infraestrutura bázika ba funsionamentu ne’e tenke di’ak. Tanba ne’e, Governu tenke investe maka’as iha área infraestrutura,” Don Noberto ko’alia asuntu ne’e bainhira dadalia ho Sekretáriu Estadu Komunikasaun Sosiál, Merício Akara, iha rezidénsia Bispu Don Noberto, Maliana Vila, Munisípiu Bobonaro, semana kotuk.
Aleinde ne’e, tuir informasaun ne’ebé Amu Bispu rona katak bainhira tempu udan, bee tama iha edifísiu RTTL laran iha ne’ebé disturba serbisu jornalista no estraga fasilidade hanesan komputadór, kamera no sasán sira seluk tan.
Bispu mós sujere atu hadi’a kualidade rekursu umanu no tau-matan mós ba saláriu rekursu umanu sira iha RTTL para sira bele iha disponibilidade no boa vontade atu halo serbisu ne’e ho lais.
Iha biban ne’e, Sekretáriu Estadu Komunikasaun Sosiál, Merício Akara, hatán katak dezde 2005 to’o agora, Governu konsege fó subsídiu miloens $36 hodi dezenvolve RTTL maibé tenke serbisu maka’as tan para investimentu ne’e fó rezultadu.
Nia haktuir, orsamentu miloens $36 ne’ebé investe ona ne’e la’ós orsamentu ki’ik, tan ne’e to’o ona tempu atu hadi’a jestaun iha RTTL, boa governasaun interna, institusionalmente ne’e tenke forte no ema ne’ebé lidera ne’e mós tenke di’ak.
“Se ida ne’e ita rezolve tiha, ita bele pasa ona ba etapa daruak atu hadi’a kona-ba konteúdu no programa ne’ebé bele dezenvolve ita-nia karáter nu’udar nasaun. Karáter no programa tenke edukativu, inspira, motiva no inovasaun,” Akara esplika.
Ba etapa tuir mai, nia informa, sei tama ba modernizasaun infraestrutura, katak, sei dezenvolve edifísiu foun RTTL ne’ebé la’ós luxu liu maibé pelumenus iha kondisaun dignu tanba RTTL iha ona propriedade (rai) iha Hudi-Laran.
Entretantu, governante ne’e tenik tuir dadus ne’ebé iha, komunidade ne’e asesu ba kanál RTTL foin atinji pursentu 47 (47%) , ne’e duni tenke luta maka’as para bele hasa’e tan ninia persentájen.
Jornalista: Xisto Freitas
Editór : Manuel Pinto
