DILI, (TATOLI) – Ministra Edukasaun, Juventude no Desportu, Dulce de Jesus Soares, hamutuk ho Embaixadora Estadus Unidus Amérika, Kathleen M. Fitzpatrick, partisipa seremónia toma pose ba voluntáriu amerikanu na’in 27 hanesan korpu dame iha Embaixada Estadu Unidu Amérika iha loron 13 dezembru 2018.
Juramentu servisu nian sai grupu dahaat husi voluntáriu korpu dame ne’ebé serbi ona iha Timor-Leste dezde loke hikas programa ne’e iha 2015.
Primeira vez iha istória programa ne’e nian iha Timor-Leste, grupu ne’e inklui voluntáriu sira ba edukasaun ne’ebé sei hanorin dalen Inglés hamutuk ho manorin-nain timoroan sira iha eskola sira terseiru síklu no sekundáriu.
Hamutuk ho voluntáriu sira ba edukasaun, korpu dame iha mós Voluntáriu sira ba dezenvolvimentu ekonómiku hodi ajuda grupu feto sira, labarik feto sira, no lider komunidade.
“Amerikanu diversu no talentozu sira ne’e refleta idealizmu aas liu husi Estadu Unidu”, Embaixadora Fitzpatrick hatete molok fó juramentu servisu nian.
“Nu’udar Voluntáriu sira Korpu-da-Paz nian, sira kontribui ba hametin amizade entre Estadu Unidu no Timor-Leste”, haktuir komunikadu embaixada Estadu Unidu Amérika iha Timor-Leste ba TATOLI, ohin
Ministra Soares – ne’ebé dezempeña papel importante iha dezenvolvimentu korpu dame iha Timor-Leste no ho adisaun voluntáriu sira ba edukasaun – enkoraja omólogu timoroan sira hodi serbisu hamutuk no apoia korpu dame nia voluntáriu sira atu nune’e sira bele atinje objetivu sira ne’ebé partilla ba malu.
Kavita Pullapilly, Diretora Korpu dame iha Timor-Leste, fó aplaude ba servisu ne’ebé voluntáriu sira ne’e no sira-nia belun timoroan sira sei kompleta iha tinan rua tuir mai.
“Voluntáriu sira no membru komunidade timoroan sira, ita-boot sira embarka hamutuk daudaun ba iha jornada furak ida, ida ne’ebé atu haburas amizade, konfiansa, aprendizajen, pesoál, no kresimentu profisionál”.
Hatutan tan: “Ita-boot sira sei fahe ba malu ita-boot sira-nia esperansa sira ba futuru. Ita-boot sira sei aprende kona-ba no dezenvolve respeitu ba ida-idak nia kulturas. Ita-boot sira ida-idak sei kontribui ba hametin Korpu-da-paz nia legadu”.
Grupu ne’e to’o iha Dili iha loron 6 outubru 2018 no hahú kedas formasaun intensivu iha lian Tétun, kultura, no tékniku. Sira sei husik hela Dili semana ne’e hamutuk ho sira-nia omólogu.
Timoroan sira hodi ba iha sira-nia komunidade iha Likisa, Ermera, Aileu, Ainaru, Baukau, Bobonaru no Manufahi.
Liu Amerikanu na’in 170 serbi ona hanesan voluntáriu korpu dame nian iha Timor-Leste dezde 2002. Voluntáriu sira moris ho família lokál sira no serbisu iha komunidade rurál durante tinan rua.
Jornalista: Rafy Belo
Editora: Rita Almeida
