DILI (TATOLI) – Ministériu Saúde (MS) liuhosi Diretora Jerál Prestasaun Servisu, Odete Viegas, kontinua husu ba inan feton sira iha timor laran tomak atu uza susubeen kinur inan nian, tanba ida ne’e nutritivu tebes ba kreximentu bebé.
“Ba inan feto sira, inklui aman sira atu fó nafatin motivasaun ba malu oinsá atu utiliza susubeen inan nian, ida ne’e nutritivu tebes ba kreximentu bebé nian, inklui inan sira bele prepara ai han ne’ebé nutritivu ba labarik bebé sira,” Odete Viegas ba jornalista sira, ohin, iha Ministériu Negósiu Estranjeiru no Kooperasaun (MNEC-Sigla Portugés), iha ámbitu asina akordu rua ba finansiamentu MNEC ho Uniaun Europeia ba reforsu millaun U$ 20,45 mai Timor-Leste hodi kombate mal nutrisaun.
Tuir nia katak inan feton sira tenke hatene katak kuandu bebé moris mai ka hosi 0 to’o fulan neen tenke hemu susu been kinur, depois fulan neen to’o tinan rua bele fó susubeen no aumenta hahán ne’ebé nutritivu ba bebé sira.
Relasiona ho ida ne’e, Ministériu Saúde liuhosi, Departamentu Promosaun Saúde fó ona treinamentu ba inan feton sira iha munisípiu, oinsá mak fó hahán ne’ebé iha nutrisaun ba labarik bebé sira, maibé husu nafatin atu inan sira bele hakbesik an nafatin ba fasilidade saúde atu hetan informasaun ne’ebé di’ak no adekuadu kona-ba saúde inan isin rua nian.
Tanba tuir dadus hosi Ministériu Saúde, iha 2010, moras króniku iha ona redusaun, ka hetan ona porsentu 58, maibé iha 2016 tun ba porsentu 46, nune’e, labarik sira ho krekas maran ho porsentu 16 sa’e ba porsentu 24. Enkuantu labarik ne’ebé mak bokur ho porsentu lima, maibé sa’e ba porsentu neen. Maibé ho esforsu tomak hosi profisionál saúde ho parseiru sira investe nafatin oinsá bele luta hodi kombate mal nutrisaun iha Timor-Leste.
Entretantu, mal nutrisaun sai asuntu Estadu nian, la’ós Ministériu mak responsabiliza mesak, maibé governu TL liuhosi liña ministeriál sira apoiu ba programa mal nutrisaun iha TL.
Jornalista : Zezito Silva
Editór : Manuel Pinto
