Ekipa TL-Indonézia, ohin konkorda finaliza área  Naktuka. Imajen António Goncalves

DILI, (TATOLI) – Governu Timor-Leste no Indonézia ohin asina ona  termu referénsia  para  suporta ekipa téknika hodi hahú identifika loloos liña fronteira rai-maran entre nasaun rua  iha 2019.

Konkordansia ne’e ankotese iha ámbitu the 4th Meeting of Senior Officials Consultation on unresolved segment of land border between the Democratic Republic of Timor Leste and The Republic of Indonesia.

“Iha reuniaun ne’e ita iha konkordansia ba malu hodi finaliza termu referénsia hodi fó mandatu ba tékniku sira hodi hala’o servisu para identifika loloos liña baliza ne’e la’o oinsá no dimensaun sosiál durante ne’e kontribui hodi sai impedementu”, hateten Xefe Ekipa Tékniku Negosiasaun Liña Fronteira Rai-maran, Roberto Soares, ba jornalista sira hafoin remata reuniaun ne’e.

Tuir kalendáriu, ekipa téknika rai rua sei hahú estudu iha terenu iha trimestre dahuluk 2019, depois sei relata rezultadu ne’e ba nivel aas hodi foti desizaun.

“Bainhira sira identifika hotu ona sira sei konvoka reuniaun espesiál entre sira hodi halo relatóriu no avaliasaun ba rezultadu iha terenu depois sei aprezenta ba reuniaun da-lima ne’ebé  Indonézia maka sei sai uma nain iha tinan oin, maibé data seidauk tanba Indonézia sei atravesa eleisaun prezidensiál no jerál iha abril 2019”, realsa tan.

Eis Governante ne’e optimista nasaun rua sei rezolve asuntu ne’e iha tinan oin. “Ida ne’e (Naktuka) maka sei determina ba konkluzaun hodi halo dokumentu finál ba ita nia fronteira terestre ho Indonézia tomak”, informa. Nia dehan falta de’it segmentu  ida iha Naktuka.

Entretantu Xefe Ekipa Tékniku Indonézia, Desra Percaya, hateten reuniaun ne’e rezulta pontu, agredese Governu tanba prontu sai uma nain hodi lidera reuniaun ba da-haat.

Pontu dala rua, nasaun rua iha kompromisu hodi tau prioridade atu finaliza segmentu iha Naktuka.

“Pontu da tolu ita realiza reuniaun iha àmbitu ida amigavel, pozitivu, ho espíritu atu atinje objetivu, ita iha ona konkordansia hodi hasai ona termu referénsia hodi vizita konjunta, planu konjunta no seluk tan iha tinan 2019”, akresenta.

Ekipa Indonézia apresia ho deklarasaun Xanana Gusmão ne’ebé hateten dame maka importante durante  prosesu negosiasaun ne’e, tanba ne’e xefe ekipa tékniku Indonézia ne’e  promete sei respeita no valoriza sujestaun ne’e.

Ikus maka Indonésia prontu atu sai uma-nain iha reuniaun da-lima iha Indonézia, 2019.

Jornalista: Agapito dos Santos

Editora: Rita Almeida

1 KOMENTÁRIU

  1. Husu ATENSAUN ba Governo Timor Leste no Governo Indonesia, Liu-liu Ekipa Tekniku Sira.
    Linha fronteira tradisional antingu no fersaun kolonialista sira (America, Jerman, Holanda, Portugues, Japaun, Misionarius, Indonesia no seluk2)..klaru ona. RAI NAKTUKA ne rai Povo Atoni Oekusi Nasaun Timor Leste nian. LAOS rai povo Atoni Nasaun Indonesia. LAIHA OPSAUN rua-tolu ka liu…Atu USA HAMUTUK ou Garap Bersama (TL-RI). OPSAUN IDA DEIT mak RAI NAKTUKA POVO ATONI OEKUSI TL NIAN. Ami Hein. Obrigado.

HAKEREK NO HATÁN

Please enter your comment!
Please enter your name here