DILI, (TATOLI)-Diretór Nasionál Seguransa Alimentár Ministériu Agrikultura no Peska (MAP), Justino dos Santos Silva, hatete polítika ne’ebé Konsellu Nasionál Seguransa, Soberania Ai-Han no Nutrisaun Timor-Leste (KONSSANTIL) halo maka oinsá mak ema ida iha loron ida han dala-tolu.
KONSSANTIL ne’e kompostu husi ministériu neen hanesan MAP, Ministériu Saúde, Ministériu Turizmu, Komérsiu no Indústria, Ministériu Edukasaun no Ministériu Finansas.
“Tanba dala barak ema dehan povu hamlaha ne’e Ministériu Agrikultura nia problema, mas mundu agora ne’e la’ós Ministériu Agrikultura, nia halo produsaun iha rai-laran karik lato’o entaun ida ne’e maka dada ba iha Ministériu Komérsiu nian tanba ne’e maka ita-nia Primeiru-Ministru nia membru uluk iha 2010 mai to’o 2012 halo deklarasaun Komoro ne’e oinsá maka bele hametin seguransa ai-han iha rai-laran”, Justino katak hafoin aprezenta Polítika Nasionál Seguransa Alimentár no Nutrisionál Timor-Leste nian iha Aitarak-Laran, ohin.
Hatutan kona-ba soberania ai-han daudaun ne’e Timor-Leste seidauk iha, tanba ne’e mak ministériu neen ne’e hamutuk oinsá maka bele hametin seguransa ai-han no nutrisaun iha rai-laran.
“Ida ne’e maka durante ne’e ami la’o hamutuk, ne’ebé ita husu komponente hotu atubele to’o iha 2030 ne’e ita la’ós dehan tenke esporta, mas hotu-hotu iha sufisiénsia ai-han ba umakain”.
Jornalista : Maria Auxiliadora
Editór : Manuel Pinto
