Entidade individu no reprezentante organizasaun ne’ebé simu Prémiu Sérgio Vieira de Mello. Imajen Mídia PR

DILI, (TATOLI) – Individu na’in tolu no organizasaun tolu simu prémiu Direitus Umanus Sérgio Vieira de Mello iha Palásiu Prezidente Nicolau Lobato, Bairru Pité, segunda ne’e. Prémiu ne’e ekivalente ho osan $10.000.00 ba kada individu nomós kada organizasaun.

Individu na’in tolu no organizasaun tolu ne’e maka hanesan Gracinda Assunção, Mateus Xavier, Eugenio Lemos, Uniaun Nasionál Agrikultór Ermera (UNAER), Fundasaun Fórum Komunikasaun Oratóriu Don Bosco iha Dili no Fundasaun AHISAUN.

Prémiu ne’ebé Xefe Estadu atribui reflete kompromisu, kriatividade, empeñu, dedikasaun, sakrifísiu, vizaun no persisténsia hosi sidadaun sira, atu promove, defende no promulga Direitus Umanus iha Timor-Leste, ho sira-nia atividade loroloron nian.

Gracinda Assunção, iha distinsaun tanba uza esperiénsia ne’ebé nia hetan hodi fila hosi Dili, ba Tutuala (postu administrativu Tutuala, munisípiu Lautein) ho kompromisu ida hodi kontribui ba labarik sira-nia formasaun, hahú kedas hosi pré-eskola.

Gracinda ho nia kriatividade, dedikasaun no persisténsia konsege lori labarik ki’ik sira bá eskola hodi aprende no halimar, hodi evita labarik sira tuir inan-aman bá to’os.

Mateus Xavier, nu’udar Mestre ida iha Nedere, iha Uatulari, Vikeke, fatin ida ne’ebé izoladu tebes.

Mateus Xavier tenke la’o oras haat nia laran hodi bá hanorin labarik sira iha Nedere, knua ida ne’ebé izoladu tebes, no eskola laiha.

Ho karáter voluntáriu, nia hatudu nia teimozia ka “ulun toos”, nia fiar no nia persisténsia to’o nia konsege duni ho apoiu hosi komunidade, harii eskola ida iha knua Nedere no hetan rekoñesimentu nu’udar profesór kontratadu. Maibé, importante liu mak nia konsege mantein prosesu aprendizajen ba labarik sira.

Eugenio Lemos, sidadaun ida ne’ebé introdús konseitu permakultura iha Timor-Leste, liuhusi harii organizasaun Permakultura Timor-Leste (PERMATIL).

Ho nia esperiénsia, dedikasaun no serbisu hamutuk ho komunidade sira, Ego Lemos konsege hamoris fila fali bee-matan rua nulu (20) iha Timor-Leste laran tomak. Ho bee-matan sira ne’e, ohinloron, komunidade sira bele utiliza no haburas sira-nia ambiente.

Hamutuk ho nia kolega sira, Ego Lemos harii mós to’os eskolár 150 iha Timor-Leste tomak. Ohin loron, iha eskola balu, to’os eskolár kontribui ba merenda eskolár, la presiza sosa ai-han hosi fatin seluk.

Uniaun Nasionál Agrikultór Ermera (UNAER), ho nia membru hamutuk xefe família rihun rua nulu resin haat, atus tolu ualu nulu resin haat (24.384), fasilita agrikultór sira no, iha tinan 2003-2006 mosu hanoin atu unifika to’os-na’in sira, iha munisípiu Ermera.

UNAER nia serbisu restaura agrikultór sira-nia konfiansa no hakbi’it direitu traballadór nian, hodi bele kontribui ba prátika agrikultura sustentável liuhusi agroflorestál, promove komérsiu justu ho konsumidór kafé iha Japaun, harii eskola ba organizadór komunidade no eskola pré-eskolár ida no tarabandu.

Fundasaun Fórum Komunikasaun Oratóriu Don Bosco, iha Dili, dedika ba tarefa difísil hodi tau matan ba vítima violénsia doméstika no violasaun seksuál. Fundasaun ida ne’e ajuda duni defende no promove direitu sidadaun sira-nian no ajuda atu restaura vítima sira-nia dignidade.

Atividade seluk ne’ebé organizasaun ne’e halo mak fasilita membru komunidade iha Tibar, ne’ebé moris hosi halibur lixu. Lixu sira hosi kapitál Dili no soe iha Tibar sai fonte rendimentu ba membru komunidade ne’ebé hela besik iha área ne’e.

Fundasaun AHISAUN, tau matan atu defende direitu ba ema ho defisiénsia tanba dalabarak hetan diskriminasaun hosi komunidade. Komunidade dala barak diskrimina sira no konsidera nu’udar ema inválidu. Ho serbisu ida ne’e, Fundasaun AHISAUN kontribui hodi halakon diskriminasaun hasoru grupu vulnerável ida, no kontribui ba sosiedade ida ne’ebé inklusiva no solidária

Atribuisaun ba prémiu ida ne’e inisiativa hosi Ex-Prezidente Repúblika no Prémiu Nobel ba Paz, Dr. José Ramos-Horta, no hanesan omenajem ba saudozu Sérgio Vieira de Mello, Diplomata hosi ONU ne’ebé lidera Administrasaun ba Tranzisaun ONU-nian iha Timor-Leste, hosi novembru 1999 to’o Maio 2002.

Tuir Prezidente Repúblika katak Sérgio Vieira de Mello kaer kna’ar ida ne’e ho vizaun ne’ebé inovativu tebes, tanba maski nia tenke tuir regras no prosedimentus ONU-nian, Sérgio Vieira de Mello hatene kompreende kontextu Timor-Leste-nian no hatene respeita tradisaun funu nian no kombatente sira hotu.

Sérgio Vieira de Mello-nia karáter umanista, hamutuk ho nia kapasidade diálogu, nia talentu atu halo negosiasaun no nia defeza ba direitus umanus no valores demokrátikus sai hanesan ezemplu no inspirasaun ba ita hotu no ba mundu tomak.

Iha biban ne’e, premiada Gracinda Assunção, hateten nia kontente tebes no konsidera hanesan grasa hosi Maromak tanba durante nia hala’o atividade ne’e nunka mehi atu manán prémiu refere.

Nia dehan, ho prémiu ne’ebé nia hetan, sei lori atu halo dezenvolvimentu ida ne’ebé bele halibur feto maluk sira no organiza sira (feto) atu sai ema ne’ebé útil ba nasaun no Estadu.

Aleinde ne’e, reprezentante Fundasaun Fórum Komunikasaun Oratóriu Don Bosco, Madalena Pinto Baptista afirma katak nia sente orgullu tebes tanba ninia organizasaun bele tama kategoria manán prémiu Sérgio Vieira de Mello.

Nia dehan, ho prémiu ida ne’e bele dezenvolve liu-tan sira nia serbisu iha área edukasaun labarik no tane ás liu-tan dignidade labarik Timor-Leste. “Prémiu ida ne’e hanesan mós motiva ami atu serbisu nafatin defende direitu labarik liuhusi atividade ne’ebé ami halo,” nia hatutan.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here