Ministru Estadu Prezidénsia Konsellu Ministru, Hermenegildo Augusto Cabral Pereira. Imajen dok.TATOLI

DILI, (TATOLI) – Governu liuhosi reuniaun estraordinária Konsellu Ministru (KM), aprova ona rezolusaun governu hodi nomea Kay Rala Xanana Gusmão nu’udar Reprezentante Espesiál Governu Timor-Leste, hodi reprezenta Estadu iha negosiasaun fronteira rai-maran ho Repúblika Indonézia.

Biban hanesan mós ezekutivu nomea Embaixadór, Roberto Sarmento de Oliveira Soares nu’dar Xefe Ekipa Téknika ba negosiasaun delimitasaun fronteira terrestre ho Repúblika Indonézia.

“Konsellu Ministru aprova rezolusaun Governu hodi nomea Maun Boot Kay Rala Xanana Gusmão hanesan Reprezentante Espesiál Governu no Estadu ninian, hodi fó kontinuidade ba negosiasaun fronteira terrestre ho Repúblika Indonézia. Rezolusaun ne’e mós inklui Xefe Ekipa Téknika”, tenik Ministru Estadu no Prezidénsia Konsellu Ministru, Agio Pereira, ba jornalista sira ohin.

Governante ne’e hatutan rezolusaun determina katak apoiu tékniku ba prosesu negosiasaun fronteira terrestre ho Repúblika Indonézia, Gabinete Fronteira Marítima mak sei fó tulun.

Parte hanesan Embaixadór Roberto Sarmento de Oliveira Soares hateten aprovasaun rezolusaun ne’e pertinente tebes tanba aprova iha momentu sertu, atu fó kontinuasaun ba negosiasaun fronteira terrestre nomós marítima ho Repúblika Indonézia.

“Rezolusaun ne’e ba ha’u onra boot tebes, ne’ebé hetan konfiansa husi Governu no Estadu, atu bele xefia ekipa negosiasaun téknika nia, atu ita bele solusiona lalais ita nia fronteira terrestre, liu-liu presedimentu ne’ebé seidauk rezolvidu ne’ebé kuaze tinan ualu ona ita la konsege solusiona”, katak.

Nia dehan antes rezolusaun ne’e hetan aprovasaun iha ona konsulta nomós komunikasaun, ne’ebé mak Timor-Leste halo ona ho Repúblika Indonézia, prinsipalmente ba fronteira terrestre nian, no parte rua iha ona konkordánsia katak iha dezembru tinan ne’e sei iha reuniaun téknika ne’ebé fó objetivu atu aselera finalizasaun ba segmentu ne’ebé seidauk konsege solusiona.

“Rezolusaun ne’e oportunu loos atu ita kontinua nafatin hatudu Timor-Leste nia kompromisu no prontidaun atu solusiona fronteira terrestre nian, hodi reforsa kooperasaun bilaterál entre nasaun rua ne’e”, katak tan.

Nia haktuir tan bazea ba diskusaun tékniku iha Governu anteriór, iha ona entendimentu no konkordánsia téknika atu oinsá hala’o atividade ne’ebé mak hanesan survey hamutuk, atu identifika loloos kona-ba liña fronteira no asuntu seluk, ne’ebé bele kontribui hodi solusiona segmentu hirak ne’e, maibé seidauk konsege hala’o.

“Rezolusaun ne’e fó forsa fali atu bele fó kontinuidade hodi bele finaliza lalais negosiasaun”, tenik tan.

Nia haktuir prosesu negosiasaun Timor-Leste no Repúblika hahú kedan iha tinan 2001 to’o agora ho karater estraordinária tanba iha kompromisu la’os de’it iha nivel polítika hanesan Estadu ho Estadu maibé povu ho povu mós.

“Iha prosesu sira ne’e hotu sempre justifika nia solusaun ne’ebé kontribui pasifikamente iha ita nia fronteira, fasilita movimentasaun ema ba ema, sasan ho sasan no transporte la’o di’ak tebes iha ita nia fronteira”, dehan tan.

Entretantu negosiasaun liña fronteira terrestre husi nasaun viziñu rua ne’e mak iha Noel Besi-Citrana no Bijael Sunan-Oben.

Fronteira Noel Besi-Citrana hanesan rejiaun ne’ebé iha área Kupang, Nusa Tenggara Timur (Indonézia) no área Ambenu ne’ebé hanesan parte husi Timor-Leste.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here