Eis Primeiru-Ministru, Rui Maria de Araújo, bainhira halo inagurasaun ensinu superiór politekniku iha Betanu. Dokumentasaun GPM.

DILI, (TATOLI) – Tuir planu estratéjiku 2011 to’o 2030 ba dezenvolvimentu ensinu superiór, governu sei harii ensinu politekniku haat iha munisipiu Lautein, Manatutu, Kovalima no Manufahi iha Betanu.

Ensinu politekniku iha Lautein sei dezenvolve área otelaria no turizmu, politekniku Manatutu sei dezenvolve iha área peska no marinu, Kovalima kona-ba área petroliféru no Institutu Politekniku Betanu (IPB) rasik kona-ba produsaun animál no konstrusaun sivíl ne’ebé oras ne’e la’o hela.

“Maibé prioridade oitavu Governu maka  harii ensinu politekniku iha Lautein, Manatutu no Betanu ne’ebé oras ne’e hahú funsiona”, hateten Ministru Ensinu Superiór, Siénsia no Kultura, Longuinhos dos Santos, ba jornalista sira iha semináriu nasionál ensinu superiór iha edifísiu Ministériu Finansa, Aitarak Laran, ohin.

Alende ensinu politekniku, tuir nia Governu mós sei implementa polítika hodi harii ensinu superiór ho naran sidade universitáriu iha munisípiu Aileu hodi prevene ba  minimizasaun  númeru konsentrasaun estudante iha kapitál nasaun.

“Aileu fatin hakmatek hodi fó konsentrasaun ba estudante sira atu aprende”, katak ministru.

Entretantu, semináriu ho karateristiku internasionál ohin ho tema elevar a Qualidade do Ensino superior Como um Fatór Chave para Aquisição  de (Novas ) compotências dos graduadospara uma sociadade em transformação, parte ida hodi komemora loron siénsia no pás ba desenvolvimentu nomos loron nasionál ensinu superiór ne’e rasik.

Rezultadu hosi semináriu ida ne’e sai sasukat ba Governu hodi dezenvolve  ensinu superiór ba futuru.

Totál ensinu superiór hamutuk 11 tantu privada no públiku maka hetan akreditasaun hodi hala’o prosesu aprendizajen.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here