Logo UNTL.

DILI, (TATOLI)-Universidade Nasionál Timor Lorosa’e (UNTL) partisipa eventu internasionál oioin hodi internasionaliza liután universidade ne’e perante komunidade internasionál, nune’e integra no sai membru ida iha simeira nivel reitór husi kontinente lima hanesan Ázia, Áfrika, Amérika, Austrália, Europa.

“UNTL mós partisipa ona iha simeira reitór sira husi cinco (lima) kontinente, UNTL nu’udar mós membru ida, simeira reitór iha primeira edisaun, konvokasaun internasionál; kontinente Ázia, Europa, Áfrika, Amérika nomós Xina”, katak Reitór UNTL, Francisco Miguel Martins, ba jornalista sira iha Kampus Liceu, UNTL, ohin.

Reitór UNTL katak durante simeira nivel reitór iha Xina, nasaun ne’e demonstra sira-nia interese aprende no estuda lian portugés no konsidera halo “lalehan iha rai” maibé Timor-Leste nafatin hanesan ne’e.

“Prontu! Ita-nia dinámika mak hanesan ne’e; sira ukun aan kle’ur, ita komesa hanesan ne’e, mas agora ita-nia produtu, UNTL nia produsaun sientífika, ne’ebé alunu no profesór sira hatudu katak dinámika ida pozitivu tebes iha prosesu dezenvolvimentu siénsia no teknolojia”, dehan.

Iha biban hanesan, Francisco Miguel Martins informa UNTL mós sei loke tan kursu ba iha área psikolojia no istória nian, maske nune’e seidauk hetan aprovasaun husi konsellu jestaun universidade nian.

“Loloos tinan oin mai ne’e loke ona. Maibé, kuandu iha aprezentasaun dósie, seidauk konvense konsellu jestaun para halo aprovasaun. Tanba ida ne’e, halo preparasaun lai, halo di’ak liután lai. Tinan oin mai, 2020, ita bele estabelese ona; psikolojia i istória”.

Iha 2020, tuir Reitór, UNTL liliu iha Fakuldade Edukasaun Arte no Umanidade (FEAU) sei estabele mós kursu ba Formasaun Formadór ba Jardin Infánsia kolabora ho Universidade do Minho (U-Minho), Portugal.

“Integradu profesór nasionál ho internasionál, ne’ebé ita atu eleva ida ne’e (pozisaun UNTL-red). Pozisaun UNTL iha ne’ebé? Pozisaun iha mundu, kapaz tebes. Iha relasaun ho ensinu superiór iha mundu tomak. Ita orgullu, ita mós tenke iha jestaun interna kapaz, dinámika. Aban bainrua ita-nia profesór, alunu sira, sei mobilidade akadémika; sira nian mai estuda iha ne’e, ita nian ba estuda iha ne’ebá”, afirma.

Entretantu, tuir rezultadu peskiza Ajénsia TATOLI nian ba portál ofisiál UNTL nian; www.untl.edu.tl, rezulta katak to’o ohin loron, UNTL halo akordu no estabelese ona rede iha lubuk ida iha mundu.

Kooperasaun sira ne’e mak, iha kontinente Áfrika mak hanesan Angola, Universidade Óscar Ribas, Cabo Verde, Guiné-Bissau, Madagascar, Moçambique, República do Congo, São Tomé e Principé.

Iha kontinente Ámerika mak hanesan Brasil; Brasil, Centro Federal de Educação Tecnológica de Minas Gerais, Universidade da Integração Internacional da Lusofonia Afro-Brasileira, Universidade de Brasília, Universidade Federal de Bahia, Universidade Federal de Minas Gerais, Universidade Federal de Roraima, Universidade Federal de Santa Catarina, Universidade Presbiteriana Mackenzie nomós Trindade e Tobago.

Iha kontinente Ázia mak hanesan Coreia do Sul; Gachon University, The Pacific Asia Society, Filipinas, Indonésia, Japão, Macau, Malásia, no Timor-Leste rasik.

Tuir mai, iha kontinente Eropa mak hanesan Bélgica; Université de Liège, Vrije Universiteit Brussel no Noruega, Portugal, República Checa.

Iha Oseánia mak hanesan Austrália; Australian Centre for International Agricultural Research, Australian Council for Education Research, Burnet Institute, Charles Darwin University, Federation University, The University of Melbourne, The University of Sydney, University of New South Wales, University of Technology Sydney, University of Western Australia, Victoria University inklui Nova Zelândia no Fiji.

Enkuantu rede ne’ebé mak UNTL integra mak hanesan AULP – Associação das Universidades de Língua Portuguesa (http://aulp.org/).

Forges – Fórum de Gestão do Ensino Superior nos Países e Regiões de Língua Portuguesa (www.aforges.net/).

RIPES – Rede de Instituições Públicas de Ensino Superior (www.ripes.unilab.edu.br/) nomós Indonesia Timor-Leste Australia Academic Partnership (parseiru entre universidade lima husi Indonézia, Universidade lima iha Timor-Leste, universidade ida husi Austrália, hodi dezenvolve objetivu komúm iha domíniu edukasaun, formasaun no peskiza)

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here