DILI (TATOLI)—Prezidente Repúblika (PR), Francisco Guterres Lú Olo, konsidera katak atuasaun oknum polísia balun ba kazu iha Kuluhun de Baixo iha domingu madrugada (18/11) ne’ebé hamate joven na’in tolu ne’e fora hosi regra.
“Polísia ne’ebé atua kazu ne’e fora hosi regra tanba polísia sira la tama serbisu, hatais tan sivíl ba festa depois lori kilat hodi tiru joven sira,” Xefe Estadu ba jornalista sira iha Katedral, Vila Verde, segunda ne’e, relasiona ho atuasaun oknum polísia balun ne’ebé hamate joven na’in tolu.
Lú Olo realsa katak atuasaun refere viola direitus umanus tanba ema ida iha direitu atu moris no proibi foti kilat atu hakotu ema nia vida.
Nia dehan katak kazu ne’e halo timoroan hotu laran susar no triste, maibé kabe ba justisa atu haree no julga hodi haree sala ne’e to’o iha ne’ebé. “Ha’u lakohi fó solusaun maibé sei ko’alia ho Komandante Jerál PNTL no Ministru ne’ebé tutela ba iha área seguransa atu haree asuntu ida ne’e,” Lú Olo afirma.
Iha Kuluhun Membru Polísia Nasionál Timor-Leste na’in rua tiru mate ema na’in tolu no hakanek ema na’in 5, iha festa koremetan ida iha Kuluhun de Baixo-Díli, Domingu (18/11/18).
Jornalista: Xisto Freitas
Editór : Manuel Pinto
