Votasaun iha jeneralidade Orsamentu Jerál Estadu 2018. Imajen António Goncalves

DILI (TATOLI) – Parlamentu Nasionál (PN) liuhosi sesaun plenária segunda, vota assentimentu dezlokasaun Prezidente Repúblika (PR) ba Roma, atu halo audiénsia ho Santidade Papa Francisco hahú loron 17 to’o 26 Novembru, nune’e rezultadu votasaun afavor 26 no kontra 35.

Xefe Bankada CNRT, Duarte Nunes husu atu adia votasaun tanba  iha tempu badak karik bele akontese buat ruma.

“Ita bele adia ba loron 15, tanba  ho hanoin katak husi ohin to’o loron 15 iha semana ida nia laran bele akontese buat ruma (karik). Ha’u hanoin AMP iha kompromisu ona katak karik iha mudansa ruma ami prontu atu fó ami nia assentimentu ba viajen Prezidente Repúblika ba ne’ebé de’it, ami la hare ba Roma ou ba fatin seluk,” nia argumenta.

Xefe Bankada PD, António da Conceição fó hanoin katak iha VI Governu Konstitusionál, Timor-Leste asina ona konkordata ida ho Vatikanu ne’ebé konteúdu prinsipál husi konkordata ne’e mak hametin relasaun ho Vatikanu ne’e rasik.

“Karik vizita ne’e bele adia maibé ho pozisaun ne’ebé ita mak propoin ba Vatikanu atu adia vizita ne’e, maibé labele pasa mensajen ida katak ita lakohi atu ita nia Xefe Estadu ba vizita Vatikanu”, katak.

Tuir deputadu ne’e, karik mensajen husi Deputadu Duarte relevante atu tetu, maibé labele kesi an ba loron no tenke loke espasu hodi pasa mensajen diplomátiku seluk, nune’e nafatin asegura relasaun di’ak no distinsaun espesífiku, Timor-Leste nia relasaun ho Vatikanu

Deputadu Bankada Fretilín, David Ximenes hateten liuhosi desizaun ne’e, deputadu sira atu fó mensajen ba komunidade internasionál sira. “Sa mensajen mak ita deputadu sira pasa ba komunidade internasionál, embaixadór sira iha ne’e iha hela.”

Antes ne’e, plenária la autoriza ona dezlokasaun Prezidente Repúblika ba Portugal hodi hametin lasu amizade entre Portugal no Timor-Leste iha loron 10 to’o 17 Jullu.

Nune’e mós vizita Xefe Estadu ba Estadus Unidus Amérika (EUA) hodi hatán konvite husi Sekretáriu Jerál Organizasaun Nasoens Unidas (ONU), António Guterres hodi partipa iha 73a  sesaun Asembleia Jerál ONU nó mós atividade oin-oin husi sesaun ne’e hanesan Simeira Dame Nelson Mandela no enkontru bilateral oin-oin iha loron 21 to’o 3 Outubru.

Vizita PR tuir mai iha loron 7 to’o 14 Dezembru, ne’ebé hetan konvite husi Sekretáriu Jerál Organizasaun Nasoens Unidas (ONU), António Guterres, hodi partisipa iha enkontru altu nivel global compact.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here