Prezidente Repúblika, Francisco Guterres Lú Olo. Imajen António Goncalves

DILI (TATOLI)—Prezidente Repúblika, Francisco Guterres Lú Olo, hala’o enkontru ho profesór no alunu sira hosi projetu Centro de Aprendizagem e Formação (CAFE) Liquiça iha Palásiu Prezidente Nicolau Lobato, Bairru Pité, kuarta ne’e.

Xefe Estadu haktuir soru-mutu ne’e nu’udar biban ida ba estudante sira hodi hato’o sira nia preokupasaun iha área edukasaun,  dezenvolvimentu no kona-ba órgaun soberania sira nia funsaun ka kompeténsia atu serbisu hamutuk no dezafiu saida maka Timor-Leste infrenta agora.

“Sira husik hela sira nia preokupasaun no hanesan aman ba nasaun ha’u tenke hatán ba sira katak biar ita bele atravesa difikuldade oi-oin maibé ha’u fiar metin sei iha dezenvolvimentu ba ita nia rai para bele asegura ita-nia oan sira nia futuru,” nia subliña.

Iha biban ne’e, Profesora Língua Portugeza CAFE, Teresa Sequeira hateten ne’e oportunidade importante ba CAFE Liquiça hodi hala’o enkontru ho Xefe Estadu hodi hato’o preokupasaun ba Prezidente Repúblika.

Nia hato’o simpatia ne’ebé boot ba Prezidente Repúblika tanba bele disponível simu estudante no profesór sira hosi CAFE ho trankuilidade, familiár no la kria distánsia entre Xefe Estadu, estudante no profesór sira.

CAFE nu’udar projetu parseria entre Governu Timor no Governu Portugés iha área língua portugeza hodi hakbiit profesór timoroan sira no estudante.

 Aleinde língua portugeza, CAFE mós prioritiza ba matéria sira hanesan biolojia, matemátika no ingles. CAFE ezisti dezde tinan 2009, ho nia estudante hamutuk ema na’in 600 hahú hosi pre-eskolár to’o ‘nono ano’.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here