Mapa hatudu área konjunta no kampu Greater Sunrise. Imajen/Espesiál

DILI, (TATOLI) – Governu liuhosi Ministériu Petróliu no Minerál (MPM) propoin milliaun $374 iha proposta Orsamentu Jerál Estadu (OJE) 2019, inklui sosa partisipasaun konsórsiu ba esplorasaun kampu mina iha área greater sunrise ho porsentu 30 hosi ConocoPhillips ho montante milliaun $350.

Prezidente no Diretór Ezekutivu Timor Gap, Francisco Monteiro. Imajen hosi Lao Hamutuk

Prezidente no Diretór Ezekutivu Timor Gap, Francisco Monteiro, hateten nia parte mai hanesan instituisaun ne’ebé tutela iha MPM, aprezenta proposta orsamentu ba Komité Revizaun Polítika OJE 2019 ne’ebé xefia husi Primeiru-Ministru (PM), Taur Matan Ruak.

“Hanesan instituisaun tutela, ami iha obrigasaun atu partisipa hodi bele fó resposta ne’ebé nesessáriu  ba proposta orsamentu ministériu nian. Timor Gap nia proposta rasik, liuhosi MPM propoin hamutuk milliaun $374 resin, ida ne’e atu uza milliaun $350, finansia ita nia partisipasaun porsentu 30 asaun Grater Sunrise”, tenik ba jornalista sira iha Ministériu Finansa, ohin.

Nia hatutan sosa partisipasaun porsentu 30 husi ConocoPhillips iha Greater Sunrise, hafoin milliaun $24 hanesan osan ba MPM nomós ninia instituisaun sira ne’ebé tutela iha ministériu ne’e.

Tuir nia sosa assaun ne’e hatudu katak Timor-Leste hola partisipasaun iha Greater Sunrise, hafoin iha negosiasaun hodi sosa kotu antes marsu 2019, tamba ne’e osan ne’e importante.

“Agora ConocoPhillips sai ona husi Greater Sunrise, ida reprezenta Estadu Timor-Leste iha ne’ebá mak Timor Gap. Kuandu tranzasaun liu ona no Timor Gap iha laran ona iha join venture (servisu hamutuk) ne’e mak ita lori ita nia estudu sira antes ne’e kona-ba kadoras nian, ekipamentu, rezerva, planta Liquefied Natural Gás (LNG) no estudu seluk tan hodi bele diskute”, dehan.

Nia hatutan: “Hafoin komesa ativamente influénsia ona hanoin nomós fó proposta tékniku komersiál ne’ebé mak mosu iha joint venture. Ita nia oportunidade sai maka’as liután atu asegura ita nia pozisaun”.

Francisco mós haktuir ekipa tékniku sira halo ona estudu barak inklui estudu viabilidade desde 2007 no 2008. “Felizmente Estadu durante tempu barak apoiu Timor Gap liuhosi MPM hodi bele halo estudu sira remata”.

Tuir nia Estadu agora iha pozisaun ne’ebé konfortável para diskute no influénsia desizaun sira iha join venture.

“Iha kualker projetu boot sira hanesan ne’e, normalmente alende estudu tékniku, ekonómiku, komersiál, sempre iha estudu impaktu ambientál”, tenik tan.

Nia dehan sempre iha forma oin-oin atu metiga impaktu sira, sempre iha impaktu balun, hanesan bainhira halo estrada ida hanesan rai-rahun no fatin ba komunidade. Tanba ne’e estudu sira identifika problema hodi buka solusaun.

“Klaru iha kualker dezenvolvementu sempre iha impaktu maibé ita sempre iha meius ne’ebé mak sufisiente atu minimiza impaktu, maibé impaktu pozitivu barak”, dehan tan.

Entretantu negosiasaun sosa partisipasaun Conocophillips hahú loron 25 to’o 28 setembru no iha loron ikus asina akordu interese partisipasaun entre Governu Timor-Leste ne’ebé reprezenta husi Reprezentante Espesiál, Xanana Gusmão, no Prezidente ConocoPhillips Austrália-Osidente, Chris Wilson, iha otél Conrad, Bali (Indonézia).

Governu hetan asisténsia husi PricewaterhouseCoopers (PwC) no Miranda & Associados, enkuantu Conocophillips hetan asisténsia husi Herbert Smith Freehills.

Tranzasaun kona-ba fa’an kobre partisipasaun husi ConocoPhillips iha kontratu partilla produsaun 03-19 no 03-20, no bainhira iha arrendamentu sira sei halo retensaun NT/RL2 no NT/RL4. Tranzasaun ne’e rasik sei remata iha trimestre dahuluk tinan 2019.

Kampu gás nian sira no sunrise no Troubadour, ne’ebé baibain koñesidu nu’udar kampu Greater Sunrise, lokaliza besik kilómetru 150 iha sudeste Timor-Leste nian no kilómetru 450 iha noroeste Darwin, Territóriu Norte nian.

Parseiru atuál sira ba joint venture greater sunrise nian maka Woodside (operadór) ho partisipasaun porsentu 33,4, ConocoPhillips 30, Shell porsentu 26,6 no Osaka Gas porsentu 10.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here