Ministru Obras Públiku, Salvador Eugénio Soares dos Reis Pires, reprezenta governu, lansa fatuk dahuluk ba reabilitasaun Estrada Aipelu-Bazartete no Ermera-Fatubessi. Imajen: Media MOP

LIKISÁ (TATOLI) – Governu liuhosi Ministériu Obras Públika (MOP) lansa fatuk dahuluk ba reabilitasaun estrada husi Prizaun Aipelo, liga ho estrada subdistritu Bazartete munisípiu Likisá no konstrusaun estrada Ermera liga ho suku Fatubessi, sub disktritu Hatulia, munisípiu Ermera.

Reabilitasaun ba estrada Prizaun Aipelo-Bazartete, munisípiu Liquisá hamutuk kilómetru 13,5, ho orsamentu hamutuk $5.083.696,15, ho durasaun tempu reabilitasaun hahú husi loron 18 Maiu 2018 to’o loron 17 Novembru tinan 2019, no trosu Ermera-Fatubessi hamutuk kilómetru 11,81, ho nia orsamentu $ 4.294.350, 60, ho durasaun tempu reabilitasaun hahú husi 18 Jullu 2018 to’o 17 Novembru 2019.

Konsulta husi projetu ne’e mak Korea Consultants International,Co,Ltd (KCI), Korea Engineering Consultant Corp (KECC) no Lea Association South Asia Pvt,Ltd (LASA), no nia Kontratór mak Shangai Construction Group (SCG).

Ministru Obras Públiku, Salvador Eugénio Soares dos Reis Pires, agradese ba Uniaun Europeia (UE) no Banku Dezenvolvimentu Aziátiku (ADB) ne’ebé fó apoiu makaas ba dezenvolvimentu Timor-Leste nian, liu-liu reabilitasaun ba estrada rurál ne’ebé sei fasilita di’ak liután ligasaun komunidade nian ba klínika, eskola, servisu no fasilita di’ak liután populasaun sira hodi lori sira-nia produtu ba merkadu.

“Reabilitasaun estrada Aipelo-Bazartete no Ermera-Fatubessi ne’e tulun husi Uniaun Europeia, fó fundus ba Governu Timor-Leste atu konstrui trosa rua ne’e. Estrada sira ne’e importante tebes tanba ligasaun ho ita nia vizaun VIII Governu Konstitusionál nian, liuhosi Planu Estratéjiku Dezenvolvimentu Nasionál (PEDN) no Objetivu Dezenvolvimentu Sustentável (ODS) 2030.”

“Ita hakarak kontinua investe iha infraestrutura bázikas, liuliu estrada nian para kontinua hasa’e dezenvolvimentu sósiu ekonómiku ba povu tomak. Ha’u espera katak bainhira estrada ne’e remata bele fó benefísiu ba povu, liuliu uma-kain rihun 8 resin ne’ebé sei asesu estrada ne’e,” Salvador afirma iha nia diskursu, Kinta ne’e.

“Ha’u husu ba ita-boot sira hotu, husi autoridade lokál, ita-boot sira-nia kooperasaun, ita-boot sira-nia kontribuisaun atu nune’e, projetu ne’e bele la’o di’ak no fó benefísiu ba ita-nia komunidade sira,” nia husu.

Iha fatin hanesan reprezentante husi Embaixadór UE mai Timor-Leste, Alexandre Leitão hateten, obra reabilitasaun estrada ne’e importante tebes ba populasaun hodi hakabit populasaun sira asesu saúde, edukasaun no merkadu.

Nune’e mós, Diretór Misaun Prezidente ADB iha Timor-Leste, Paolo Spantigati, agradese ba Governu Timor-Leste liuliu Ministériu Obras Públiku ne’ebé hala’o prosesu hodi realiza reabilitasaun ba estrada refere.

Entretantu tuir pájina Ministériu Obras Públiku, orsamentu ba reabilitasaun estrada trosu rua ne’e hetan doasaun husi Uniaun Europeia (UE) ho montante millaun $22,62 nu’udar fundu adisional atu ajuda hadi’a estrada nasionál sira ne’ebé pertense ba projetu reabilitasaun ligasaun estrada ne’ebé daudauk ne’e la’o hela no jere husi Banku Dezenvolvimentu Aziátiku (ADB).

Nune’e projetu hirak ne’e sei kria ligasaun estrada ne’ebé seguru iha rai-laran, liuliu liga munisípiu ba área rurál, alende ne’e, liuhosi reabilitasaun estrada ne’e bele kria empregu ba komunidade sira, tanba tuir sensus 2015 hatudu katak populasaun 37.000 resin mak ladún ativu iha ekonómikamente. Tanba ne’e, ho konstrusaun estrada rua ne’e bele hametin konektividade liga entre munisípiu ka área rurál sira.

Serimónia tau fatuk dahuluk ne’e partisipa direita husi, Ministru MOP, Ministru Transporte no Komunikasaun, José Agostinho da Silva, Vise Ministru Saúde, Bonifacio Maucoli dos Reis, Sekretáriu Estadu Arte no Kultura, Teófilo Caldas, deputadus balun, Embaixadór UE, Diretór Misaun Prezidente ADB iha Timor-Leste, Unidade Manajemen Projeitu (PMU), inklui reprezentante sira husi Komandu PNTL munisípiu Likisa no Ermera, traballadór kompañia Shanghai, autoridade munisípiu, postu no autoridade lokál husi munisípiu Liquisá no Ermera, inklui komunidade sira iha área refere.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here