Foto/Google.

DILI, (TATOLI)-Inspetór Jerál Traballu (IJE) Sekretáriu Estadu Formasaun Profisionál no Empregu (SEFOPE), Rofino Lopes dos Reis, informa vizita inspesaun ne’ebé SEFOPE halo dezde inísiu tinan ne’e to’o agora hamutuk 1023 ne’ebé mak identifika ona kazu hamutuk 510.

“Husi vizita inspesaun ne’e iha setór atividade komérsiu, konstrusaun, indústria, otél, ofisina, transporte, agrikultura no seluk-seluk tan (liga ba over time) hamutuk 971 ne’ebé ita bá. Iha vizita inspesaun ne’e tipu kazu ne’ebé ita hetan iha 510 ne’ebé halai liu ba saláriu tarde, serbisu latuir padraun ne’ebé iha, kontratu traballu laiha, mas kompañia fó serbisu loroloron”, Rofino katak iha Kaikoli, ohin.

Aleinde ne’e kona-ba seguransa saúde tanba ema dalaruma serbisu iha área konstrusaun, mas lauza ekipamentu serbisu hanesan lauza kapasete, sapatu, luvas, masker no dalaruma larega rai-rahun no kazu seluk mak autorizasaun vistu traballu nian.

“Totál traballadór ne’ebé prejudikadu husi empreza ne’ebé viola hamutuk 3648 no husi totál kazu ne’ebé identifika inspesaun jerál traballu aplika ona multa ba kompañia ne’ebé viola lei traballu. Husi vizita inspesaun ne’e hasai ona termu notifikasaun hamutuk 663 ba empreza nasionál no internasionál. Iha termu ne’ebé ita fó ne’e iha auto adverténsia (infrasaun ne’ebé halo mas ki’ik) 45 entaun ita xama atensaun de’it”.

Enkuantu iha auto notísia (infrasaun ne’ebé grave) iha 315 ne’ebé maka empreza tenke selu koima ki’ik liu ne’e dois vezes saláriu báziku Funsaun Públika nian no másimu $1500.  Nune’e husi janeiru to’o agora ne’e sansaun ne’ebé empreza selu hamutuk dólar 3000 no balun ne’ebé sei iha prosesu no seidauk selu tanba empreza nia na’in sai hela ne’e hamutuk $57.000 resin ne’ebé sei iha prosesu laran.

“Husi kazu sira ne’e hotu barak liu mai husi kontratu traballu, tuirmai autorizasaun traballu, iha kazu ne’e barak tanba ema estranjeiru sira mai Timór laiha autorizasaun, mas sira halo atividade entaun kuandu vizita inspesaun maka sira laiha autorizasaun ita aplika sansaun ba sira. Númeru tuir fali mai maka seguransa saúde, dalaruma kompañia barak maka halo konstrusaun, estrada, barak lauza ekipamentu safety nian”.

Tanba ne’e inspetór ne’e relata infrasaun ne’ebé komete liuliu autorizasaun serbisu ba ema li’ur barak liu husi Indonézia tanba númeru traballadór barak liu husi nasaun viziña ne’e, tuirmai Xina no Filipina.

“Ita haree haree nasaun tolu ne’e nia movimentu mai Timór barak liu mak sira, entaun ita haree husi númeru ne’e violasaun barak liu mós nasaun tolu ne’e”.

Entantu númeru ne’ebé fó serbisu barak liu ne’e maka Xina tanba sira loke empreza barak, tuir fali Indonézia no Filipina.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here