Primeiru-Ministru, Taur Matan Ruak. Imajen GPM

DILI, (TATOLI) – Primeiru-Ministru, Taur Matan Ruak, hateten Governu sei enkuadra fulan ne’e (setembru) ba orsamentu duo-désimu, tanba orsamentu jerál Estadu 2018 nian Prezidente Repúblika seidauk promulga.

“Ami preokupa loos ho orsamentu jerál Estadu (OJE) 2018 ne’ebé Prezidente Repúblika seidauk promulga, tanba ne’e ohin ha’u husu ba Prezidente Repúblika katak aban Konsellu Ministru sei halo análize ida kona-ba situasaun ida ne’e no bainhira laiha impedementu jurídiku, ami sei halo desizaun ida enkuadra setembru ba orsamentu duo-désimu”, Taur ba jornalista sira iha Palásiu Prezidente Nicolau Lobato, Bairru Pité, kinta ne’e, hafoin enkontru ho Prezidente Repúblika, Francisco Guterres Lú Olo.

Nia esplika objetivu hosi enkuadramentu refere atu selu saláriu no vensimentu nomós despeza seluk.

Xefe Governu hatutan tan Governu sei iha orsamentu kuaze milliaun $80 iha kofre Estadu atu uza ba pagamentu no klarifika mós katak orsamentu refere nu’udar restu hosi milliaun $140 ne’ebé foin lalais Governu hatan ba nesesidade iha jullu no agustu nomós mai hosi impostu sira.

Tuir nia karik OJE 2018 promulgadu tarde sei implika ba buat rua maka pagamentu sira ba setembru nian no implementasaun OJE 2018, tanba orsamentu ne’e ba fulan haat nian maibé se hatama tiha setembru ba duo-désimu, signifika tempu efetivu atu ezekuta OJE 2018 ne’e iha fulan tolu de’it.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here