DILI, (TATOLI) – Diretór Jerál Autoridade Aduaneira (AA), José António Fátima Abílio, husu atu halo invetigasaun hodi klarifika auzénsia Alfándega nian, nune’e públiku mós bele esklaresidu.

“Parte ida ami husu para ema labele espekula buat oioin, di’ak liu halo investigasaun para klaru, públiku mós esklaresidu, ami mós satisfeitu ho rezultadu. Se karik rezultadu dehan ami sala, ami prontu. Desizaun saida mak foti ba ami, hanesan funsionáriu Estadu ami prontu”, Abílio katak iha Alfándega, ohin.

Nia afirma, ninia parte lakohi ema balun politiza fali situasaun, tanba instituisaun Estadu tenke funsiona hanesan ema tékniku no profisionál.

Abílio subliña sente estrañu bainhira PM dehan Alfándega lapartisipa iha enkontru. “Sente xoke, tanba saida, hodi bainhira. Normalmente iha ne’e bainhira enkontru ho diretór nasionál, xefe unidade sira ha’u dehan ita hanesan servidór Estadu, servidór povu, ita labele kria fali prosesu burokrasia iha ita-nia autoridade. Ema ruma presiza atu halo enkontru lapresia nia halo appointment uluk, bainhira nia mai. tanba nia presiza, ita tenke fó atendimentu, kuandu ita oukupadu dehan oukupadu”.

Aleinde ne’e atu halo enkontru ka koordenasaun ho instituisaun seluk liuhusi telemovel de’it mós Alfándega bá no instituisaun seluk mai, depende ida ne’ebé hakarak organiza, lapresiza konvite formál.

“Ne’e ami iha fleksibilidade ida ne’e, mas hanesan aman ida mak fó sai informasaun ne’e ami simu, respeita, kumpri hanesan aman hanorin oan”.

Abílio hatutan Ministra Finansas en ezersísiu, Sara Lobo Brites, mós preokupa ho liafuan ne’ebé mak Primeiru-Ministru, Taur Matan Ruak, hato’o iha ámbitu jornada orsamentál nian iha Ministériu Finansas, horisehik.

“Ohin dadeer Vise-Ministra mós bolu ha’u bá ko’alia no hakarak atu orsida loraik enkontru, tanba vise mós preokupa ho liafaun ne’ebé maka Primeiru-Ministu foti. Hanesan Ministériu ne’ebé tutela iha responsabilidade, tanba todan ida ne’e la’ós ba Alfándega de’it, maibé hanesan ministériu ne’ebé tutela mós sente”.

Iha pájina ofisiál Gabinete Primeiru-Ministru (GPM) ne’ebé Tatoli asesu, Primeiru-Ministru, Taur Matan Ruak, lamenta tebes ho auzénsia Alfándega nian ne’eb’é la iha justifikasaun atu tuir enkontru ho Xefe Governu dala tolu tuituir malu, ne’ebé ke Xefe Ezekutivu rasik mak husu atu enkontru ho Alfandega, tanba ne’e aproveita enkontru Jornada Orsamental 2019 nian, horisehik, Xefe Governu bolu atensaun ba órgaun ka Ajénsia Públika Estadu nian no mós serbidor estadu sira hotu atu koopera ho Estadu no Governu ba buat di’ak ne’ebé Governu hakarak implementa ho objetivu ida de’it ba Timor-Leste nia bem-estar.

“Dehan katak imi ne’e ema ketak ida, ne’e kuidadu! Ita iha ne’e objetivu ida de’it, tanba ne’e ha’u lakohi ita-boot sira halo fali buat seluk ba reziste iha kotuk, reziste ba saida nian? Ema ne’ebé reziste ba buat di’ak ne’e signifika nia ne’e la’ós ita nia maluk”, hatete PM iha pájina ofisiál GPM.

“Ha’u-nia mensajen favór ida transmite ba funsionáriu hotu-hotu, katak rezisténsia ba buat di’ak ne’e estrañu. Iha ita-nia rain ida ne’e labele iha, ne’e hatudu katak ita-boot sira iha ajenda ketak ida, ne’e ha’u sei la permite para imi halo ida ne’e”, afirma tan Xefe Governu.

Hatutan foin loron rua PM ko’alia ho Ministru sira dehan, iha dalan rua para ema halo destruisaun ba nasaun, ida lori kilat no ida la lori kilat. “Ita-boot sira hola parte ba ida la lori kilat maibé sobu nasaun ne’e. Ha’u preokupa loos ba ida ne’e.

“Iha kazu ida ha’u alerta ba Alfándega, ohin ha’u husu ba ha’u-nia sekretária para husu ba Ministra Finansas, tanba saida mak sira la partisipa reuniaun tolu ke ha’u rasik mak husu? Primeiru la partisipa ne’e ita tolera, mas segundu terseiru, ne’e saida mak ne’e? Orden ne’e husi Primeiru-Ministru mak tun ba kraik mas la partisipa i la justifika, ne’e kona-ba Aeroportu Suai nian. Ha’u hanesan Primeiru-Ministru, estrañu loos, entaun sé mak atu manda?”, katak tan.

Tanba ne’e Xefe Governu apela ba serbidor estadu hotu, importante serbisu hamutuk, duké ida-idak hala’o ninian, tanba Governu ne’e atu la’o di’ak ka aat Primeiru-Ministru mak sei responsabiliza uluk no hanesan Xefe Governu nia laiha ajenda seluk maibé ajenda mak ba Timór no ho transparente.

Jornalista: Maria Auxiliadora

Editora: Rita Almeida

Notísia ne’ebé relasiona :

Alfándega Klarifika Auzénsia Enkontru Ho PM Tanba Lasimu Konvite

 

HAKEREK NO HATÁN

Please enter your comment!
Please enter your name here