Membru PN husi Bankada FRETILIN no membru Komisaun B, David Dias Ximenes "Mandati". Imajen/ António Gonçalves

DILI, (TATOLI) – Prezidente Asosiasaun Veteranu no Kombatente Libertasaun Nasionál, David Dias Ximenes Mandati, hatete tempu badak asosiasaun ne’e sei realiza semináriu ida kona-ba reafirmasaun valór luta iha dezenvolvimentu nasionál, tanba ne’e nia ekipa mai konvida Primeiru-Ministru (PM), Taur Matan Ruak, atu sai oradór iha atividade ne’e.

“Ami atu marka loron, maibé Primeiru-Ministru dehan tenke haree fali nia ajenda, hafoin nia sei determina loron ba ami para ami prepara atu hala’o semináriu ida. Ami husu Primeiru-Ministru atu halo abertura hodi ko’alia uitoan”, tenik ba jornalista sira hafoin hasoru malu ho Xefe Governu iha Palásiu Governu, ohin.

Biban ne’e, prezidente asosiasaun hamutuk ho nia ekipa mós ko’alia ba PM kona-ba asosiasaun nia vida. “Ami hala’o hela buat balun ne’ebé mak ami atu halo ba família veteranu, ne’e mak ami hato’o ba PM”.

Nune’e mós dezenvolvimentu asosiasaun no família veteranu nia, tanba ne’e mak nia mai ho tékniku nain rua hodi ko’alia kona-ba asuntu ne’e.

Tuir nia, resposta PM pozitivu tebes, katak tenke organiza-án para komesa bele haree malu, labele ida-idak hariku-án para mosu kecemburuan sosiál.

“Ami nia problema agora mak veteranu barak moris ladun di’ak, ami hakarak ajuda uitoan maibé tenke ajuda malu. Tanba desde eis Primeiru-Ministru, Xanana Gusmão, nia tempu kuandu asosiasaun ne’e hamrik nia sempre ajuda para asosaisaun nia vida ne’e bele la’o ho di’ak”, katak tan.

Kona-ba orsamentu ba asosiaaun ne’e, nia dehan PM mak sei ko’alia, tanba asosiasaun ne’e tama ona iha organizasaun sosiedade sivíl.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here