Ministru Defeza no Ministru Interiór en-ezersísiu, Filomeno da Paixão de Jesus

DILI (TATOLI)—Ministru Defeza no Ministru Interiór en-ezersísiu, Filomeno da Paixão de Jesus, hateten Komandu FALINTIL-Forsa Defeza Timor-Leste (F-FDTL) sei fahe karreta kuzina ambulante doasaun hosi Governu Xineze ba komponente sira iha F-FDTL no rezerva mós ba lojístika Sentru Formasaun F-FDTL Metinaro.

Nia esplika, karreta kuzina ambulante ne’e hamutuk hitu (7) ne’ebé oras ne’e para ona iha Kuartél Jerál F-FDTL Fatuhada, ho nia funsaun atu uza te’in ba soldadu sira no kada kamionete bele te’in ba soldadu sira hamutuk atus-lima (500) iha situasaun emerjénsia.

“Kuandu emerjénsia ruma ami maka te’in rasik hodi fornese alimentasaun ba soldadu tomak,” governante ne’e ba jornalista sira iha Palásiu Prezidente Nicolau Lobato, Bairru Pité, Dili, tersa ne’e, hafoin hala’o enkontru ho Prezidente Repúblika, Francisco Guterres Lú Olo, kona-ba serbisu Ministériu Defeza no Seguransa.

Aleinde ne’e, Filomeno haktuir, Governu Xineze mós apoiu botas, kama, fatin tau kilat no lona ba forsa F-FDTL no klarifika katak doasaun hirak ne’e nia kustu ho montante serka miloens $2.

Iha biban ne’e, nia esplika, orsamentu ba Ministériu Defeza ho montante miloens $3 no miloens $18 ba F-FDTL, enkuantu ba Ministériu Interiór ho montante miloens $9 ba Ministériu Interiór no miloens $27 ba PNTL.

“Liu-liu ba Ministériu Defeza, orsamentu ne’e atu uza ba sustentabilidade de’it to’o tinan ida ne’e nia rohan. Tantu Ministériu Defeza no Interiór, laiha dívidas konforme relatóriu ne’ebé mai hosi diretór jerál instituisaun rua ne’e. Maibé, PNTL no F-FDTL maka iha dívidas oituan maibé iha ona orsamentu atu selu,” Filomeno haklaken.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here