Reprejentante Konvensaun Konservatóriu Migratoriu Espésie Dugong (karau tasi), Donna Kwan, foto hamutuk ho membru governu sira hafoin asina nota entendimentu iha Palásiu Governu, ohin. Imajen Egas Cristovão

DILI, (TATOLI) – Governu liuhosi Sekretáriu Estadu Ambiente (SEA), Demétrio de Amaral de Carvalho, ho reprejentante Konvensaun Konservatóriu Migratoriu Espésie Dugong (karau tasi), Donna Kwan, asina nota entendimentu hodi konserva no proteje karau tasi iha Timor-Leste ne’ebé besik atu mohu.

ʺOhin ita asina memorandum entendimentu hodi konserva dugong hanesan komponente ida ba konvensaun konservatóriu Dugongʺ, hateten Demétrio hafoin asina memorandum iha Palasíu Governu, ohin.

Implementasaun la’o ona iha postu administrativu Atauru, Tasitolu, Tibar-munisípiu Likisa durante tinan ida resin, identifika animal tasi ne’e ameasadu mohu.

ʺProjetu ne’e besik atu remata, maibé ita iha esperansa futuru sei hetan tan apoiu hosi Dugong internasionál, tanba oras ne’e ita esforsu hamutuk atu hetan fundu alterasaun klimátika Governu Alemaña iha posibidade hodi finansia projetu ne’e durante tinan hirak ba oinʺ, katak.

Dugong iha potensialidade turístiku boot bainhira proteje no kuidadu. “Sé ita konserva di’ak hanesan atrasaun turizmu importante no espésie boot, ema bele luku iha tasi laran hodi haree, tanba iha mundu animál ne’e la barak. Timor-Leste mós sítiu ida importante bele hareeʺ, realsa.

Fatin potensiál ba Dugong ne’ebé identifikadu mak Dili iha Atauro, Tasitolu, Lautem iha Lore, Tutuala no Com, enkuantu Likisa iha Tibar no Ulmera.

Donna Kwan hateten Timor nu’udar nasaun ba da 27 maka asina ona memorandum entendimentu ba Konservasaun Dugong iha mundu.

ʺAsina memorandu entendimentu ne’e importante ba Timor-Leste hodi konserva Dugong atu labele mohuʺ, hateten.

Entretantu, Timor-Leste seidauk sai membru hosi organizasaun internasionál ba konservasaun Dugong ne’ebe oras ne’e ho nia nasaun membru hamutuk 123.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here