Diretór Ezekutivu, Programa Monitorizasaun Sistema Judisiáriu (JSMP-sigla inglés), Luis de Oliveira Sampaio, ho ninia ekipa sorumutu ho Sekretáriu Estadu Komunikasaun Sosiál, Mericio Juvenal dos Reis Akara, iha Palásiu Governu, ohin. Foto Egas Cristovão

DILI, (TATOLI) – Diretór Ezekutivu, Programa Monitorizasaun Sistema Judisiáriu (JSMP-sigla inglés), Luis de Oliveira Sampaio, sei fó formasaun judisiária ba jornalista no editór hamutuk 40 ho tema justisa ho sensibilidade jéneru ne’ebé sei hala’o iha loron 1 to’o 5 outubru 2018.

JSMP hetan tulun tékniku hosi  Sekretariu Estadu ba Igualdade no Inkluzaun Sosiál, Konsellu Imprensa, Sekretariu Estadu Komunikasaun Sosiál.

Tuir nia observasaun kobertura jornalista sira iha área justisa laiha balansu hodi akompaña kazu to’o rohan.

“Kazu balun ne’ebé involve figura polítika mídia sira tuir hosi inisiu to’o desizaun, maibé kazu ki’ik ladun interese. Loloos kazu ki’ik sira ne’e presiza hetan atensaun hosi mídia sira atu hatene sira nia problema loloos hodi kanaliza informasaun ba instituisaun relevante ba sira nia kazuʺ, hateten diretór JSMP hafoin informa planu ba Sekretáriu Estadu Komunikasaun Sosiál, Merício Juvinal dos Reis Akara, iha Palásiu Governu, ohin.

Luis sampaio konsidera formasaun ne’e importante hodi kapasita jornalista sira iha área justisa.

Jornalista iha knaar importante atu kontrola servisu judisiáriu hanesan juiz, prokuradór, defensór sira hodi hala’o funsaun ho di’ak liután.

Formasaun ne’e sei fahe ba grupu editor no jornalista.

Sekretáriu Estadu Komunikasaun Sosiál, Merício Juvinal dos Reis Akara, prontu kolabora no apoiu programa JSPM.

ʺSEKOMS prontu kolabora ho JSMP para hahú agora ba futuru jornalista sira bele halo kobertura di’ak liután iha setór justisaʺ, afirma.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here