Primeiru-Ministru, Taur Matan Ruak, Prezidenti Parlamentu Nasionál, Arão Noé, iha lansamentu Portu Tibar. Imajen MF

TIBAR, (TATOLI) – Primeiru-Ministru (PM), Taur Matan Ruak, halo ona lansamentu ba konstrusaun projetu Parseria Públika Privada (PPP) Portu Tibar ne’ebé sei konstroe husi China Harbour Timor, Lda ho durasaun tinan tolu ne’ebé hahú husi 30 agostu 2018 to’o 30 agostu 2021.

Iha serimónia ne’e PM hatete implementasaun Projetu Portu ne’e hanesan Parseria Públiku Privada ida reprezenta mós investimentu ho dimensaun boot liu ne’ebé hala’o ona, to’o agora, iha infraestrutura públika sira iha país ne’e.

Tanba ne’e, Timor-Leste fó daudaun sinál ida ba investidór sira seluk katak país ne’e fatin atrativu ida atu halo negósiu.

ʺTanba ne’e ami konsidera katak lansamentu ba konstrusaun Portu foun iha baía Tibar, ne’ebé ohin ita hala’o, sai hanesan Governu ida ne’e nia prioridade boot ida mós ba dezenvolvimentu projetu infraestrutura sira no sei sai duni marku fundamentál ida iha dezenvolvimentu Timor-Leste nianʺ, PM afirma iha nia diskursu iha Portu Tibar, ohin.

Xefe Ezekutivu ne’e salienta portu ne’e sei fó mós kondisaun nesesáriu sira, atu Timor-Leste bele transforma án iha futuru hanesan interfase (Hub) rejionál ida ba transporte merkadoria no tránzitu kontentór sira nian, nune’e bele prodús rendimentu adisionál sira ba País ne’e. Maibé, konstrusaun infraestrutura sira ho dimensaun ida-ne’e, provoka mós risku, liuliu risku sira kona-ba problema ambientál.

ʺBaía Tibar ne’e sai mós fatin ida ne’ebé iha valór ambientál boot no hanesan fatin ida ne’ebé di’ak liu atu harii Portu iha área sira ne’ebé besik Diliʺ, katak.

Eis Prezidente Repúblika ne’e dehan mantein ekilíbriu entre kondisaun rua ne’e sai hanesan dezafiu boot ida ba nia ekipa.

ʺMaibé, ami fiar katak implementasaun husi medida boot sira mitigasaun nian, ne’ebé hili ona ba projetu ida-ne’e tuir prátika ambientál hirak ne’ebé di’ak liu no tuir norma sira husi Kooperasaun Finanseira Internasionál (IFC, sigla iha lian inglés) ka Banku Mundiál, ne’ebé kombina ho konsesaun projetu ne’e nian ba Grupu Bolloré, operadór portuáriu ida mós husi hirak ne’ebé iha prestíjiu boot iha nivel mundiál, garante mai ita katak projetu ne’e sei la’o ho impaktu ambientál ne’ebé sira sei haree didi’akʺ.

ʺAmi fiar mós katak Porto de Timor no sira hotu ne’ebé intervein iha konstrusaun portu foun ne’e nian sei kumpre sira-nia koopromisu no fornese infraestrutura ida ne’ebé sei merese atu sai hanesan ita-nia povu nia orgulluʺ.

PM sublina faktu katak projetu ida-ne’e hahú kedas ona iha mandatu Governu Konstitusioná V nian, no hetan apoiu husi Governu hirak ne’ebé ukur tuirmai, inklui apoiu husi Governu ne’ebé nia lidera.

ʺTanba ne’e, lansamentu ba konstrusaun infraestrutura ida ne’ebé vitál ba ita-nia País nia futuru ne’e, la’ós hanesan susesu individuál ema ka Governu ida nian de’it, maibé nu’udar rezultadu husi ita-nia serbisu iha ekipa no esforsu koletivuʺ.

Taur hatete iha 30 agostu 2018, sai hanesan momentu ida ne’ebé espesiál tebes, la’ós de’it tanba marka eventu istóriku aniversáriu da-19 Konsulta Populár nian, maibé mós tanba marka inísiu husi país ne’e nia konetividade ida ne’ebé di’ak liután no kondisaun lojístika sira ne’ebé di’ak liu, ne’ebé sei lori benefísiu ekonómiku ba Timor-Leste tomak.

Development Director of Bolloré Ports, Philippe Julien, (Bolloré empreza Fransa ne’ebé halo parseria ho Governu Timor-Leste), hatete iha loron espesiál 30 agostu 2018 ne’e hahú era foun ekonómika nian ne’ebé mak komérsiu Timor-Leste iha rejiaun sei iha pasu foun ba benefísiu sidadaun timoroan sira-nian.

Vise President Senior Engineer husi China Harbour, Kong Qi, hatete iha konstrusaun portu ne’e sei kria empregu ba komunidade lokál no hafoin tinan tolu ró-ahi boot sei para iha Portu Tibar.

ʺOhin komesa serimónia dahuluk ba ponte kais Tibar nian. Ami sei kria postu traballu maizumenus ba ema liu na’in-500 hanesan ne’eʺ.

Kong hatete projetu ba konstrusaun ne’e boot liu kuaze millaun 200 no ida ne’e di’ak tanba Timór hanesan illa.

Jornalista : Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here