Primeiru-Ministru, Taur Matan Ruak, kaer liman ho Defensoria Públika Jerál, Câncio Xavier, iha Palásiu Governu. Imajen/António Goncalves

DILI, (TATOLI) – Câncio Xavier hetan posse hanesan Defensór Públiku Jerál husi Primeiru-Ministru (PM), Taur Matan Ruak, hodi substitui Sérgio da Costa Hornai.

Antes ne’e, Defensór Públiku Jerál sesante, Sérgio da Costa Hornai, prezide enkontru ida hamutuk ho Ministru Justisa, Manuel Cárceres, inkui Konsellu Superior Defensoria Públika Jerál sira hodi  rona opiniaun membru konsellu sira nian ba nomeasaun kandidatu Defensór Públiku Jerál foun.

Nune’e, bazea ba enkontru, Defensoria Públiku Jerál sessante ho Ministru Justisa, Manuel Cárceres da Costa, no ho membru Konsellu Superior Defensoria Públiku Jerál iha loron 24 jullu liuba deside hodi nomea lista kandidatura nain tolu ba PM hodi deside, ikus Xefe Governu nomeia Câncio Xavier.

Defensoria Públika Jerál, Cancio Xavier, kumprementa eis Prezidente Defensoria Públika, Sergio Hornai, iha Palásiu Governu, ohin. Foto António Goncalves

“Setór justisa la’os de’it halo juramentu maibé kuandu ko’alia kona-ba setór justisa, ita tenke ko’alia mós kona-ba infraestrutura atu bele fó espasu ba prefesionál sira hodi servisu no assegura segredu professionál nian”, tenik Defensór Públiku Jerál foun, Câncio Xavier, ba jornalista sira iha Palásiu Governu, sesta (24/8), hafoin toma pose.

Tuir nia infraestrutura, halo investimentu ba kuadru pessoál no presiza promove no sensibiliza profesionál sira atu bele halo servisu ne’ebé di’ak.

“Defensoria Públiku eziste la’ós atu tuur de’it, maibé tuir estatístika Defensoria Públika halo servisu pursentu 97 ne’e prosesu hotu-hotu kanál ba orgaun ida ne’e, signifika servisu ne’ebé orgaun judisiáriu halo presiza investimentu barak iha área rekursu umanu”, katak.

Nia dehan agora dadauk oinsá mak bele fó asisténsia jurídika no estra-jusisiál ba povu sira mak dook husi tribunál. “Ita presiza ema, orsamentu no presiza armonizasaun kona-ba lei”.

“Atu servisu fó asisténsia jurídika ba ita nia povu, defensória públika eziste atu fó asisténsia jurídika no estra-judisiál ba povu ne’ebé mak laiha kbiit atu selu advogadu privadu”, dehan tan.

Foto hamutuk ho Primeiru-Ministru, Taur Matan Ruak, hafoin serimonia tomada pose defensoria públika jerál foun iha Palásiu Governu, ohin. Foto António Goncalves

Nune’e nia espera kualker governasaun, inklui Governu da-ualu Konstitusionál nafatin fó apóiu ba Defensoria Públika nu’udar pilár prinsipál ida iha área justisa, tanba programa sira ne’ebé mak governu trasa inklui setór justisa ne’e hanesan fatór prinsipál atu bele apóiu ba sidadaun.

“Iha konstituisaun RDTL labele legál justisa ba ema tan de’it rasa no kór, ne’ebé Defensoria Públika haree kualker situasaun nafatin fó asisténsia ba ema hotu ne’ebé mak karik sira presiza bele hetan tulun”, dehan tan.

Entretantu tuir tuir lei Xefe Governu mak nomeia Defensoria Públika Jerál, bazea ba sub proposta husi Ministru Justisa nian.

Enkuantu tuir dekretu lei númeru 10 /2017, Defensór Públiku Jerál sei asumi de’it kargu durante tinan haat no bele estende ba periodu ida de’it (tinan 8), maibé tanba razaun impasse politika, Governu da-ualu liuhusi Ministra Justisa sessante iha tempu ne’eba estende mandatu Sérgio da Costa Hornai to’o formasaun Governu da-ualu Konstitusionál.

Partisipa iha seremónia tomada pose mak Prezidente Tribunal Rekursu,  Deolindo dos Santos, Ministru Justisa, Manuel Cárceres da Costa, Sekretáriu Estadu Terras no Propriedades, Mário Ximenes, Prokuradór Jerál Repúblika, José da Costa Ximenes, Defensor Públiku Jerál sessante, Sérgio da Costa Hornai nomós família Defensór Públiku Jerál nomeadu.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here