Foto google.

DILI, (TATOLI) – Programa Ai-han Mundiál (WFP-sigla inglés) kontinua apoiu governu hodi hadi’a nutrisaun no seguransa ai-han ba  povu Timor-Leste, liuliu labarik sira.

Diretór Rejionál ba Azía no Pasífiku, David Kaatru, hateten WFP iha ninia programa ba tinan tolu maka kontinua apoiu governu liuhosi programa merenda eskolár hodi prevene problema nutrisaun la di’ak,  seguransa ai-han, dezastre naturál, mudansa klimátika no seluk tan.

˝Ami haree liu ba programa merenda eskólar, fortifikasaun ai-han hodi hasa’e nutrisaun, prepara apoiu ba dezastre naturais no mudansa klimátika˝, hateten David Kaatru ba jornalista hafoin hasoru Primeiru-Ministru, Taur Matan Ruak, iha Palasíu Governu, ohin.

David Kaatru haktuir Xefe Governu apresia no husu organizasaun mundíal ne’e atu fó apoiu governu iha área edukasaun, saúde  no sosiál.

“Ami diskusaun di’ak ho Primeiru-Ministru, tanba ne’e husu atu foku liu ba área saúde, edukasaun no sosiais˝, hatutan.

WFP hala’o ona servisu hodi hasa’e nutrisaun ba labarik sira desde 1999.

“Primeiru-Ministru mós apresia ho servisu hamutuk ne’ebé la’o ona durante tinan 20, tanba ne’e ami sei hametin relasaun di’ak liután ho Governu˝, afirma.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here