Diretór Ezekutivu, Yogi R. Bahar, hamutuk ho ninia ekipa hasoru Primeiru-Ministru, Taur Matan Ruak, iha Palásiu Governu, ohin. Foto GPM

DILI, (TATOLI) – Kompañia operadór telekomunikasaun, Telkomcel relata investimentu fibra ótika ba Primeiru-Ministru (PM), Taur Matan Ruak, ne’ebé antes ne’e ekipa husi kompañia ne’e halo ona aprezentasaun ba Ministru Transporte no Komunikasaun, José Agostinho da Silva, no Prezidente Parlamentu Nasionál (PPN), Arão Noe.

“Ami hakarak halo investimentu ba fibra ótika, tanba agora dadauk presu internet iha uma karun loos, bainhira instala ona fibra ótika, presu sei tun, ida ne’e mak ami hato’o ba Primeiru-Ministru”, tenik Diretór Ezekutivu, Yogi R. Bahar, ba jornalista sira hafoin remata enkontru ho Xefe Estadu iha Palásiu Governu, segunda (20/8).

Nia hatutan implikasaun ne’e sei boot ba munisípiu sira, tanba sei iha komérsiu elektróniku (e-commerce) hanesan iha Indonézia iha Bukalapak, Tokopedia no seluk tan.

“Ami espera produtu iha distritu sira bele faan no ita dezenvolve ekonomia iha distritu sira”, dehan.

Biban ne’e, nia parte mós haktuir prosesu investimentu fibra ótiku ne’ebé la’o ona iha governu anterior no iha governu foun ne’e halo ona aprezentasaun ba ministru José Agostinho, PPN no ikus liu mak mai PM.

“Ami hanesan kompañia ne’ebé kumpri ho prosesu ne’ebé estabelese, hodi hatudu ba kompañia estranjeiru seluk bainhira hakarak investe iha país ne’e tenke tuir regra. Ami mós iha esperansa, investimentu ne’e kontinua atu haforsa ekonomia iha Díli no distritu seluk”, dehan tan.

Nia dehan tan, alende harii industria telekomunikasaun, harii mós industria turizmu, bolsu estudu no sempre halo investimentu.

Yogi mós haktuir PM Taur dehan agora dadauk nia sei proukupa ho buat seluk, maibé nia simu ho di’ak no bainhira remata prosesu internál ne’ebé mak iha governu ne’e, nia sei follow up investimentu ne’e.

“Ida ne’e sinal di’ak, tanba bainhira país ida halo investimentu, sei iha orsamentu atu dezenvolve ekonomia iha Timor-Leste”.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here