Ilustrasaun

DILI, (TATOLI) – Januário Freitas Pinto, reprejentante juventude mane hosi Cruz Vermelha Timor-Leste (CVTL), alerta ba ninia maluk joven sira atu hamutuk halo Timor livre hosi lixu.

Januário Freitas Pinto, reprezentante delegadu juventude mane, CVTL. Foto FB: Ryo Loriku Lialuli

“Kontribuisaun timoroan tomak nian mak bele hadook husi moras sira ne’ebé nia kauza mai husi so’e fo’er arbiru”, dehan nia ba Tatoli via telefone hodi konfirma sira nian atividade hamoos repartisaun públika ne’ebé hetan riskadu hosi ema irresponsável sira.

Alumni Universidade Nasionál Timor Lorosa’e (UNTL) ne’e haktuir alende komemora loron internasionál juventude nian ne’ebé realiza iha 12 agostu kada tinan, objetivu seluk mak promove ambiente ne’ebé moos no saudável ba sidadaun, liuliu hamoos fo’er iha fatin leet-leet, bairru sira iha kapitál.

“Ita halo limpeza atu fó atensaun ba ema hotu, labele soe fo’er arbiru. Tanba, sei afeta ba ita-nia saúde”.

Alende ne’e ninia parte pinta foun lia-fuan sira ne’ebé riska iha didin lolon fatin públiku.

Durante hala’o atividade ne’e, tuir nia komunidade sei menus koñesimentu ba jestaun ambiente no saúde bázika, tanba nota husi hahalok so’e fo’er arbiru.

“Fó hanoin no atensaun ba malu atu kuidadu Timor no asegura atu moos hela de’it. Organiza malu iha grupu no bairru sira atu hamoos fo’er kada semana no hadi’a hikas sasan sira ne’ebé pinta ka riska aat hotu ona. Buat ki’ik sira ne’ebé mak ita halo folin boot tebes atu valoriza timoroan sira ne’ebé mate no sakrifika ba rai ida ne’e. Dignifika nafatin Timor nia naran di’ak”, sujere.

Alumni Fakuldade Filozofia, UNTL ne’e mós sujere ba governu, liliu Sekretáriu Estadu Meiu Ambiente (SEMA) atu kria lei ka regulamentu rigorozu kona-ba la soe fo’er arbiru, nune’e ema ruma mak komete, simu sansaun.

“Tetu atu reduz mós importasaun sira ne’ebé mak kontribui maka’as ba lixu, ezemplu hanesan akua, rebusadu no seluk tan. Ba timoroan sira ne’ebé mak fa’an sasan inklui xinez, favor ida! Loja ka kioske oin la presiza ita-nia pesoál jestaun lixu ka ekipa saneamentu mak hamoos. Idaidak hanoin atu hamoos rasik aredór hirak ne’e”, afirma.

Atividade ne’e organiza husi CVTL, Sentru Juventude Bekora, Sentru Juventude Komoro, ne’ebé hetan konfiansa husi Sekretáriu Estadu Juvenude no Desportu (SEJD).

Alende hetan apoiu husi SEJD, apoiu mós husi Fundu Nasaun Unida ba Populasaun (UNFPA-sigla inglés).

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here