DILI, (TATOLI) – Ministru Reforma Lejislativa no Asuntu Parlamentár (MRLAP) kompromete kontinua halo inovasaun ba administrasaun públika, propoin mekanismu no métodu di’ak ba boa governasaun, introdus no halo akompañamentu ba governu eletrónika hodi promove transparénsia.
“Ami nia kna’ar atu haree lei sira iha Timor, lei sira ne’ebé seidauk iha sei propoin, nune’e lei sira ne’e labele sai fali obstaklu ba dezenvolvimentu”, hatete Ministru Fídelis Leite Magalhães ba jornalista sira iha Parlamentu Nasionál, ohin.
Kna’ar seluk, nia haktuir servisu hamutuk ho ministériu justisa no tribunál hodi moderniza setór judisiáriu iha rai-laran. Enkuantu, asuntu parlamentár maka oinsá reprezenta governu iha PN.
Sekretariu Estadu Komunikasaun Sosiál, CEFTEC, Ajénsia TATOLI, RTTL,ep, oras ne’e tutela ba MRLAP.
Prioridade ministériu ne’e mak hadi’a kondisaun interna, harii komisaun reforma lejizlativa, no komisaun reforma judisiáriu.
Jornalista: Agapito dos Santos
Editora: Rita Almeida
