Asosiasaun Halibur Defisiensia Matan Timor-Leste (AHDTL) ho ekipa, ohin hasoru Sekretáriu Estadu Komunikasaun Sosiál, Merício Juvinal dos Reis Akara, iha Palásiu Governu. Foto Egas Cristovão

DILI, (TATOLI) – Diretór Ezekutivu Asosiasaun Halibur Defisiensia Matan Timor-Leste (AHDTL), Gaspar Afonso, hateten sira nia parte iha rekursu, tanba ne’e sira bele koopera ho mídia nain sira hodi fahe informasaun ba defisiensia sira.

“Ami fó solusaun ba sua exelénsia katak ami mós iha rekursu hanesan ba lian jestuál, nune’e ema ho defisiensia tilun ne’ebé labele rona no ko’alia bele asesu notísia iha televizaun, iha jornal, iha printing braille, nune’e ema ho defisiensia matan bele asesu ba notísia jornal”, tenik nia hafoin sorumutu ho Sekretáriu Estadu Komunikasaun Sosiál, Merício Juvinal dos Reis Akara, iha Palásiu Governu, ohin.

Gaspar hatutan asosiasaun ne’e bele fó formasaun ba jornalista sira hodi hatene lian jestuál, nune’e bele sai tradutór iha televizasaun nomós jornál sira atu emprime notísia ba letra braille.

AHDTL rekomenda atu hatutan preokupasaun ne’e iha Konsellu Ministru, nune’e asosiasaun ne’e bele sai parseiru ne’ebé di’ak ba governu hodi kontribui no dezenvolve Nasaun.

Biban ne’e, nia parte mós husu mídia hotu atu uza termu ne’ebé loos hodi fó sai informasaun kona-ba defisiente sira.

“Dalabarak mídia sira nafatin uza termu tuan ne’ebé mak hanesan alezadu ka buat sira seluk aat no ema la normál, ema normál. Ami mai atu foka ba sua exelensia, hodi fó hanoin ba mídia nain sira”, dehan.

Parte seluk Sekretáriu Estadu, Merício Juvinal Akara, SEKOMS kompromete sei kanaliza ba ministériu relevante hanesan Ministériu Solidaridade Sosiál no Inkluzivu, Edukasaun no ministériu seluk, kuandu ninia parte labele hatan ba preokupasaun ne’e.

“SEKOMS sei sai ponte komunikasaun entre sidadaun no kolega defisiente sira nomós ponte entre governu ho defisiente sira”, katak.

Governante ne’e dehan ho númeru defisiente 38.118, sira mós iha direitu hanesan ho sidadaun hotu.

“Ohin ami ko’alia parte SEKOMS sei komunika ho mídia nain sira, liu-liu sei ko’alia ho Prezidente RTTL.ep, TATOLI no Rádiu Komunidade para buka solusaun, atu fasilita sira”, dehan.

Hodi hatutan: “Ami ko’alia ho Rádiu Komunidade, tanba ida ne’e mós hanesan parte ida husi SEKOMS, sira bele, haú ko’alia prátika hodi servisu voluntáriu hodi hatudu sira nia kapasidade iha ne’eba, ho mídia nain sira, ita ko’alia saida mak ita bele halo atu fasilita kolega sira”, dehan tan.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here