Diretór Ezekutivu Permakultura Timor-Leste (PERMATIL), Eugénio “Ego” Lemos, hamutuk ho estudante sira atividade to'os eskolar. FB Imaju Exposto Theeast

DILI, (TATOLI) – Diretór Ezekutivu Permakultura Timor-Leste (PERMATIL), Eugénio “Ego” Lemos, hatete PERMATIL implementa programa to’os eskolár hodi reforsa programa Ministériu Edukasaun (ME) nian, kona-ba to’os eskolár, ne’ebé tama mós iha kuríkulu nasionál ensinu primária nian, nu’udar mós laboratóriu ida.

“Atu mós reforsa reduz problema mal nutrisaun iha baze, iha ne’ebé mós labarik sira bele aprende abilidade, sira-nia matenek oinsa mak ba aplika iha sira-nia to’os uma hun”, katak Ego Lemos ba TATOLI iha nia knaar fatin, edifísiu PERMATIL, Farol, ohin.

Fundadór PERMATIL ne’e mós relata programa to’os eskolár ne’ebé implementa ona durante ne’e kobre ona munisípiu 11; Lautem ho Rejiaun Administrativa Espesiál Oecusse-Ambeno (RAEOA) mak seidauk.

Ego katak depois implementasaun programa ne’e, PERMATIL halo ona avaliasaun maibé relatóriu seidauk sai tanba sei hein hela péritu avaliadór husi Austrália hodi halo validasaun.

Maske nune’e nia tenik husi obervasaun ne’ebé PERMATIL halo iha eskola barak ona nota katak to’os eskolár sira konsege kontribui ba merende eskolár.

“Depois labarik sira barak mak lori sira-nia matenek produz matéria orgániku, kantareiru, sira konsege lori ba to’os uma hun. Haree katak família barak mak adopta ona programa to’os eskolár ba iha sira-nia to’os uma hun”, tenik tan.

Ego Lemos fó ezemplu, iha Ataúro, kuaze iha eskola hirak kedas, até eskola ida bele influénsia suku ida tomak.

Iha suku Biqueli, antes ne’e, sira la’o ba Ataúro vila, hola merenda eskolár kada semana maibé depois implementa programa to’os eskolár, komunidade mós produz modo no fornese fali ba Ataúro vila, vise-versa. Sira konsege asina ho eskola haat iha Ataúro hodi fornese ba fali eskola sira; susesu ida kapaz tebes.

Iha Lacluta, kuaze postu eskolár tomak, eskola hotu kedas. Sira konsege fa’an husi rezultadu to’os eskolar ne’e rasik, kada kolleta kuaze sira sempre hetan osan; sira fa’an ba merenda eskolár i sira fa’an ba komunidade enjerál.

“Iha Ermera kuaze barak la halimar, eskola barak, ami labele sura, i ami hein hela rezultadu husi avalisaun, haree rasik númeru hira mak fó impaktu ba komunidade”, haktuir.

Vantajen

“Haree husi nia vantajen boot la halimar kompara ho desvantajen. Obstakúlu sira ne’ebé mak durante ne’e PERMATIL hasoru mak maske programa to’os eskolár ne’e tama ona iha kurikúlu nasionál no Ministériu Edukasaun mós harii ona departamentu ida halo konta ba to’os eskolár maibé governu rasik ladauk aloka orsamentu ba iha ne’ebá”, akresenta.

Hodi hatutan: “Tanba ne’e mak difikulta, hanesan organizasaun lokál ne’ebé ki’ik, ho vontade boot maibé difikulta ho orsamentu. Entaun kada eskola ne’ebé implementa ona iha kada teritóriu tomak, PERMATIL hetan ajuda, dalaruma husi individu husi Austrália, husi organizasaun oioin; hanesan sidade amizade sira mós suporta. Nune’e mós hetan suporta husi organizasaun sira husi Fransa, Japaun. Maioria organizasaun sira husi Austrália”.

Nune’e, PERMATIL hakarak rekomenda ba governu katak: “Se ita hakarak rezolve lalais problema mal nutrisaun iha ita-nia rain, ha’u hanoin, ita presiza konsidera iha orsamentu estadu para orsida orsamentu estadu ne’e bele iha kada eskola iha sira-nia to’os eskolár”.

To’os Eskolar Sai Laboratóriu

Diretór Ezekutivu afirma to’os eskolár la’ós de’it objetivu atu hasa’e produsaun maibé to’os eskolár mós bele utiliza sai hanesan laboratóriu para mós bele fasilita prosesu aprendizajen; atu nune’e mestre sira labele hanorin de’it iha sala laran, halo labarik sira baruk atu mai eskola maibé ho maneira foun, utiliza to’os eskolár hodi hanorin siénsia oioin.

“Fiar katak labarik sira interese atu mai eskola ne’e boot la halimar i fásil ba mestre sira, depende de’it ba mestre sira-nia kreatividade. Entaun parese ita la konsege utiliza testu, ne’ebé livru maten, dalaruma lakon kontestuál, maibé utiliza to’os eskolár, ne’ebé kulturalmente apropriadu ba iha área idaidak ninian”, nia dehan.

To’os eskolár, tuir diretór Egos Lemos, fasilita hodi hanorin siénsia barak inklui matemátika. “Fiar katak ho to’os eskolár it abele rezolve buat barak”, subliña.

Ego Lemos esplika mós katak to’os eskolár mós bele sai fatin di’ak hodi hanorin ita-nia jerasaun foun kona-ba jestaun meiu ambientál tanba tuir diretór Ego Lemos katak problema ne’ebé dadaun ne’e ita Timor hasoru; ita-nia nasaun ne’e rai ida ne’ebé furak maibé lixu barak (rai labele absorve kalen, plástiku) fó problema boot ba ita-nia rain, tanba ita la kontrola importasaun ba sasan sira ne’ebé mak uza hodi utiliza lixu barak.

Entaun liuhusi to’os eskolár mós bele oinsa utiliza matéria orgániku; babain liuhusi ai-tahan, komunidade sunu de’it, maibé liuhusi to’os eskolár rekomenda atu rekolla hamutuk, tau hamutuk depois ita halo fali sai adubu orgániku.

Depois ba plástiku, kalen, boraxa sira tau hamutuk no hanorin labarik sira tau oinsa atu bele resikla fila fali ka uzu ba buat seluk. Nune’e to’os eskolár fasilita atu hanorin labarik sira kona-ba jestaun ambientál.

Diretór Ego Lemos mós informa katak iha matéria to’ós eskolár nia hanorin mós kona-ba lutu moris. Katak, eskola barak mak ezije hakarak atu halo sira-nia lutu ho semente, uza moru, ho besi pois karun no dalabarak governu rasik laduun iha orsamentu atu fasilita eskola hotu. Alende ida ne’e mós, komunidade tesi ai-laran hodi halo lutu. Ne’ebé, lutu ida ne’ebé tahan to’o tinan ida, tinan rua maibé tesi to’o ai-laran.

“Entaun liuhusi matéria kona-ba lutu moris, oinsa mak kada eskola kuda rasik nia lutu; lutu ne’ebé bele kolleta hodi han, kolleta hodi fó han animál nomós oinsa hodi halo rai bokur”, esplika tenik.

Alende ida ne’e, nia sanak halo maran, uza hodi te’in, hodi sunu te’in merenda eskolár.

“Entaun buat sira ne’e hotu mak PERMATIL nia mehi katak se ita-nia governu, ita-nia estadu, ajénsia lokál sira hamutuk, it abele loke to’os eskolár iha teritóriu tomak fiar katak problema sira ne’ebé mak ita hasoru durante ne’e hanesan mal nutrisaun, degradasaun meiu ambiente, hahalok sira soe lixu arbiru, ita bele reduz problema balun”, hatutan tan.

Ida mak kontribui ba edukasaun ba moris, tanba buat ida kuda, hanesan ita hatene katak maioria populasaun hela iha área rurál depende ba iha agrikultura, maibé realidade ne’ebé ita hasoru mak ita kuda ai-han oioin kada tinan maibé importasaun aumenta ba bebeik.

“Ho to’os eskolár bele hanorin, bele eduka fali ita-nia jerasaun foun oinsa mak bele hadomi ita-nia produtu rasik; produtu ne’ebé ita kuda, ita han tuir tempu kolleta atu nune’e ita bele hamenus importasaun ai-han mai ita-nia rain no ita hamenus gastu. Entaun, buat sira ne’e aban bainrua se esforsu ho di’ak, tinan lima, sanulu mai, fiar katak Timor sei sai nasaun indepedente ai-han,” reforsa diretór PERMATIL ne’e.

Entretantu, programa to’os eskolár ne’e seidauk implementa iha RAEOA no Lautem maibé PERMATIL garante katak sei hala’o to’o iha ne’ebá, maske nune’e depende ba finanseiru.

Lautem nian, PERMATIL dadaun ne’e sei halo hela negosiasaun ho ajénsia internasionál balun no iha prosesu hela. Enkuantu, RAEOA nian PERMATIL seidauk iha meius tanba RAEOA iha nia polítika oinseluk nune’e sira seidauk to’o iha ne’ebá. “Mas, ami prioridade uluk lai ba munisípiu 12, ne’ebé mak liuhusi edukasaun sentrál ita bele. Ba RAEOA ami presiza iha mekanizmu seluk atu liga ba iha ne’ebá. Autoridade RAEOA hakarak, rekoopera, PREMATIL pronto,” nia kompromete.

PERMATIL hanesan organizasaun ki’ik ho membru permanente na’in neen (feto tolu, mane tolu) no restu ne’e voluntáriu hotu mai husi UNTL (Universidade Nasionál Timor Lorosa’e), UNPAZ (Universidade da Paz) no sekundáriu sira, depois PERMATIL desloka sira ba fatin implementasaun programa to’os eskolár.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here