ATAMBUA (TATOLI) – Vokalis Grupu Banda Coklat Indonézia, Kikan hakarak tebes mai hatudu performance múzika iha Timor-Leste, kuandu hetan konvite.

“Ha’u hakarak fó sai katak ha’u involve iha mundu múzika ne’e durante tinan 16, maibé to’o agora ladauk hetan oportunidade atu bele tuir festa boot ruma iha Timor-Leste hodi anima povu Timor-Leste liuhosi múzika. Enkuantu Timor-Leste konvida  ha’u prontu ba,” Kikan informa ba jornalista sira iha ámbitu festival cross border Atambua 2018 foin lais ne’e.

Artista ne’e sente kontente bainhira iha futuru governu Timor-Leste konvida nia hodi hatudu performance iha Timor.

“Ha’u hakarak haree Timor-Leste ho nia natureza. Se kuandu tempu ruma ne’ebé Timor-Leste konvida ha’u, ha’u sei kontente tebes hodi hola prezensa iha Timor-Leste,” Kikan haktuir.

Nia konta tan, tinan rua kotuk liu ba konsege hasoru artista Timor-Leste sira no agora hasoru tan artista Ego Lemos, ba oportunidade hirak ne’e nia orgullu tebes. No hein katak artista indonézia ho Timor bele hametin relasaun di’ak tebes.

“Uluk Timor-Leste parte hosi Indonézia no agora Independente ona. Entaun liuhosi múzika ida ne’e atu fó mensajen di’ak atu ema hotu hamutuk. Tanba pasadu husik ba pasadu maibé agora ita hamutuk hodi ba oin,” artista ne’e enkoraja tan

Iha parte seluk, Ego Lemos sente kontente no orgullu tebes tanba bele hasoru malu ho artista Indonézia hodi bele konsertu liuhosi festival cross border iha Atambua.

“Ami mai reprezenta Timor-Leste hodi mai Atambua. Atividade ne’e di’ak tanba bele kria relasaun ne’ebé forte entre nasaun rua,” nia esplika. Hodi hatutan, “Ami artista prontu atu apoiu ba programa governu nasaun rua nian liuliu kria relasaun di’ak ho artista Indonézia nian.”

 Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here