Primeiru Ministru, Taur Matan Ruak aprezenta programa VIII Governu iha Parlamentu Nasionál. Foto Antonio Goncalves

DILI (TATOLI)-Governu konstitusionál da-walu komprete sei reativa fali negosiasaun ho Indonézia kona-ba delimitasaun fronteira tereste ho Indonézia, inklui esforsu atu implementa tratadu fronteira marítima ho Austrália.

“Iha tempu badak, Governu sei reativa fali negosiasoens ho Indonézia, hodi finaliza delimitasaun fronteira terrestre, ho de’it ona segmentos rua (Oben/Bijael Sunan e Citrana) iha Oe-cusse, hodi nune’e asegura definitivamente nia direitu soberania kona-ba espasu teritoriál Timor-Leste nian,” informa Primeiru-ministru, Taur Matan Ruak, iha Parlamentu Nasionál, ohin.

Primeiru-ministru ne’e hatutan, relasiona ho delimitasaun fronteira marítima ho Indonézia, hahú ona mós konsulta formál, hodi dezenvolve daudaun ona, hosi governu rua ne’e, prinsípiu no orientasaun atu tama ba negosiasaun, no konkorda ona atu tuir aplikasaun direitu internasionál, iha ámbitu Konvensaun   Nasaun Unida ba Direitu ba Tasi (CNUDM-sigla portugés), hodi define fronteira marítima entre nasaun rua ne’e.

“Nune’e, Governu sei retoma fali negosiasoens formais kona-ba fronteiras marítimas, hafoin hetan delimitasaun finál iha fronteira terestre. Nune’e, diskusoens internas no preparasaun dokumentasaun polítika, téknika no legál ne’ebé sei orienta negosiasoens sira ne’e, sei komesa prepara dadaun ona,” garante xefe governu ne’e.

Ho Austrália, primeiru-ministru dehan katak esforsu atu implementa tratadu fronteira marítima ho Austrália.

“Governu sei, ho prioridade másima, dezenvolve esforsus atu implementa Tratadu kona-ba Fronteiras Marítimas, inklui kedas mós prosesu ratifikasaun hosi Parlamentu Nasionál, nune’e mós kontinua negosiasoens ho kompanhias petrolíferas ne’ebé envolve iha Kampu Greater Sunrise, hodi estabelese rejime espesiál ida nebé fó benefísius ba parte rua hotu,” Garante Taur.

Primeiru-ministru akresenta kestaun ne’e, tuir Primeiru-ministru katak Loron 6 fulan Marsu tinan 2018, asinala duni momentu istóriku ida ba ita-nia nasaun, ho asinatura Tratadu Fronteiras Marítimas entre Timor-Leste no Austrália, iha Nova Iorque.

Tratadu ida ne’e mosu nu’udar rezultadu hosi prosesu ida naruk ba rezolusaun disputa entre país rua ne’e, kona-ba área marítima idaidak nian, prosesu ne’ebé inklui mós esforsu diplomátiku, konsulta no negosiasaun bilaterál sira nomós liuhosi prosesu legál entre Estadus rua ne’e.

Bainhira hahú, pela primeira vez iha istória, iha fulan Abril tinan 2016, prosesu konsiliasaun obrigatória ho Austrália, iha ámbitu Konvensaun Nasoens Unidas kona-ba Direitu ba Tasi, Timor-Leste konsege, durante tinan 2017 tomak, lori Austrália ba tur iha meza atu negósia.

Ho asisténsia hosi Komisaun Konsiliasaun, país rua ne’e fó pasu signifikativu ho objetivu atu halo akordu ida kona-ba fronteira marítima permanente sira, hodi, finalmente, iha Sede Nasoens Unidas iha Nova Iorque, ho prezensa hosi Sekretáriu Jeral Nasoens Unidas, António Guterres, bele asina duni Tratadu ne’e.

Tanba ne’e, primeiru-ministru Taur Matan Ruak kompromete katak governu sei, ho prioridade másima, dezenvolve esforsu sira atu implementa Tratadu kona-ba Fronteiras Marítimas.

Nune’e, Governu sei kontinua dezenvolve esforsus hodi implementa akordu ne’ebé estabelese ona ho Austrália, hodi rekoñese ligasaun ne’ebé labele hakotu entre delimitasaun fronteira marítima no kriasaun rejime espesiál ida ba dezenvolvimentu Greater Sunrise, ne’ebé inklui dezenvolvimentu rekursu sira nian no dispozisaun sira kona-ba fahe reseita, ne’ebé sei mai hosi esplorasaun rekursu hirak ne’e.

Negosiasaun sira ne’e sei tuir polítika ida nebé firme, atu defende interese nasionál, hodi hare sei ba dezenvolvimentu sosiál no ekonómiku, ne’ebé sustentável ba povu Timor.

Relasiona ho susesu iha prosesu konsiliasaun obrigatória no konsidera mós publikasaun hosi “Relatóriu Finál no Rekomendasaun hosi Komisaun Konsiliasaun”, Timor-Leste, iha nia ámbitu polítika esterna, sei kontinua promove direitu internasionál no rezolusaun pasífika ba disputa entre Estadu, hodi partilla ninia esperiénsia rasik no partisipa iha konferénsia no fórum internasionál sira, ne’ebé promove direitu internasionál, direitu internasionál ba Tasi no, liuliu Konvensaun Nasaun Unida ba Direitu ba Tasi, nomós kona-ba prinsípiu katak Estadu hothotu tenke, ho ‘boa-fé’, kumpre idaidak nia obrigasaun sira, tuir direitu internasionál no respeita direitus legál Estadu seluk nian.

Estadus hotu-hotu, boot ka ki’ik, hanesan de’it perante direitu internasionál no perante tribunál internasionál sira.

“Iha nível internu, Governu sei implementa medidas estratéjikas atu defende independénsia no integridade teritoriál, inklui mós supervizaun ba espasu terestre, marítimu nomós aéreo, iha ámbitu reforsu soberania nasionál,” dehan Primeiru-ministru, Taur Matan Ruak, iha nia aprezentasaun.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here