Konferénsia imprensa husi MNEK, aprezenta husi diretór jerál Juvêncio Martins akompañadu husi diretór priviléjiu no imunidade, Vanio Florival no Diretór Asuntu Konsulár, Celio Moniz. Foto TATOLI: Rafy Belo

DILI, (TATOLI) – Ministériu Negósiu Estranjeiru no Kooperasaun (MNEK) desmente notísia ne’ebé públika husi mídia online Tafara edisaun 23 jullu ho títulu “MNEK Kansela Viajen Ba Renova Pasaporte, Sonio ho Família iha NZ Ameasadu Hetan Deportasaun”, loloos ne’e MNEK la kansela maibé atu rasionaliza.

Diretór Jerál MNEK, Juvêncio Martins, esklarese katak nia hetan fiar husi ministru Dionísio Babo Soares hodi klarifika kona-ba informasaun ne’e katak MNEK la kansela viajen ba renova pasaporte husi Sonio Guteres Fernandes no família

“Ne’ebé atu hateten ba (ita boot sira), Tafara katak ne’e la’ós kanselamentu maibé atu rasionaliza de’it rekursu ne’ebé mak ita iha, para justisa mak atu bele ba, maibé ho apoiu serbisu perifériku ne’e Ministériu Negósiu Estranjeiru ne’ebé iha ona embaixada no konsuladu sira”, hateten diretór Juvêncio ba jornalista sira liuhusi konferénsia imprensa iha MNEK, Praia dos Coqueiros, kuarta ne’e.

Nia klarifika Sonio Guterres Fonseca, nu’udar timoroan ne’ebé hetan bolsa estudu husi governu Nova Zelándia hodi ba estuda iha ne’ebá no la autoriza atu lori família, maibé nia lori família no ikus mai pasaporte mate, depois atu husu apoiu ba MNEK atu ajuda trata pasaporte no MNEK hakarak ajuda família ida maibé nia rejeita; hakarak ajuda família nian hotu.

“Akontese to’o nia oan nia pasaporte atu mate, nia ejize mai, husu mai iha ne’e, para governu haruka team ida ba para fó suporta ba nia no nia oan sira; pasaporte atu mate ona. Entaun, momentu ne’ebá ita-nia ministru uluk (Aurélio Guterres) ba hasoru malu ho Ministra Justisa, Maria Ângela Carrascalão sira ko’alia i iha desizaun ida. Katak, haruka ekipa ida ba atu produz pasaporte,” esplika diretór ne’e.

Tanba ne’e, tuir diretór Juvêncio, MNEK halo esforsu hodi rezolve situasaun Sonio ho nia família, liuhusi koordenasaun hamutuk ho Ministériu Justisa (MJ) tanba ministériu ne’e mak iha autoridade hasai pasaporte.

Nune’e, MJ husu fali ba MNEK atu aplika títulu privilejiu no imunidade ba Sonio ho nia família, maske nune’e MNEK- Diresaun Jerál Asuntu Konsulares no Diresaun Imunidade, halo parese no rejeita nia ho família mai trata pasaporte iha TL mak filafali ba Nova Zelándia, tanba nia mak lori família ba NZ.

“Ministru sira ba ko’alia malu, atu haruka team ida ba. Agora ita iha problema ida katak embaixada Nova Zelándia la produz vistu iha ne’e, iha Jakarta. Entaun, prosesu ne’e iha Jakarta; lori tempu,” nia haktuir.

Diretór Juvêncio esplika bainhira prosesu ne’e tuun mai governu muda tiha ona no imajina katak orsamentu bele iha ona hodi rezolve lalais prosesu ne’e maibé tanba impase polítika, implika mós MNEK nia kapasidade finanseiru atu bele haruka ekipa tékniku atu ba.

“Nune’e, ministru foun (Dionísio Soares Babo) to’o mai, ami hasoru ministru foun i ministru foun mak sei asina CPV (cost-per-view) atu haruka fali ema ida atu ba fali Nova Zelándia ho Ministériu Justisa nian. Mas, ita haree katak lae, para ita bele rasionaliza fali rekursu para atu labele gasta osan barak liu tanba osan duodésimu de’it; osan la to’o. Entaun ita husik de’it mak Ministériu Justisa mak ba de’it,” nia hatutan.

Diretór Juvêncio Martins haktuir katak MNEK iha nia servisu extensaun periférikus, iha nia konsul iha Bali (Indonézia), Darwin, Sidney, iha embaixada iha Canbera nomós iha Welinton, Nova Zelándia. Maibé, autoridade ne’ebé produz pasaporte ne’e mak Ministériu Justisa.

“Ne’ebé, atu klarifika de’it katak la’ós kanselamentu, favór halo loos fali liafuan sira ne’e para públiku bele hatene,” salienta diretór Juvêncio Martins.

Nia konsidera mós katak deklarasaun bolseiru Sonio Guteres Fonseca nian ne’ebé Tafara públika, Tafara la sala tanba publika tuir de’it bolseiru nia deklarasaun. Maske nune’e, nia espera ho klarifikasaun ne’e jornalista sira, liliu tafara, bele iha klarifikasaun, bele hatene katak ne’e la’ós kanselamentu maibé ne’e rasionalizasun rekursu.

“Agora hein de’it justisa tan justisa mak órgaun ne’ebé mak kompetente atu hasai pasaporte ne’e tanba sira mak tenke hatan fali hanusa?,” nia konklui.

Konferénsia imprensa husi MNEK, aprezenta husi diretór jerál Juvêncio Martins akompañadu husi diretór priviléjiu no imunidade, Vanio Florival no Diretór Asuntu Konsulár, Celio Moniz.

Entretantu, to’o notísia ne’e hatun, Ajénsia TATOLI seidauk konfirma ho bolseiru Sonio Guteres Fonseca, inklui autoridade ne’ebé trata kazu ne’e hanesan MJ nomós husi Nova Zelándia rasik, ne’ebé oferese bols aba sidadaun timoroan, Sonio Guteres Fonseca.

 Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here