Sekretáriu Estadu Komunikasaun Sosiál, Merício Juvinal dos Reis “Akara”

DILI (TATOLI)-Sekretáriu Estadu Komunikasaun Sosiál (SEKOMS) no JICA (Japan International Cooperation Agency) hasoru malu, ohin, hodi haree posibilidade kooperasaun ne’ebé mak JICA bele fó apoiu, iha área komunikasaun sosiál ninian.

Sekretáriu Estadu Komunikasaun Sosiál, Merício Juvinal dos Reis “Akara” informa katak iha hasoru malu ne’e JICA  informa sira-nia progresu apoiu RTTL (Rádiu no Televizaun Timor-Leste) no SEKOMS reprezenta governu informa governu nia prioridade iha área komunikasaun sosiál.

Katak, prioridade SEKOMS nian mak atu hadi’a duni, tau-matan duni RTTL, nu’udar prioridade ida, haree husi parte infrastrutura, ekipamentu, oinsa halo dijitalizasaun ba sistema inklui rekursu ba RTTL.

“Entaun iha aspetu ida ne’e, ha’u mós rona katak governu Japaun liuhusi JICA, sira mós interese atu haree kooperasaun ho sira atu dezenvolve RTTL,” informa Sekretáriu Estadu Merício Akara ba Jornalista sira iha nia kna’ar fatin, Palásiu Governu.

Governante ne’e akresenta katak ne’e hanoin di’ak no presiza kontinua komunikasaun, tanba iha aspetu barak mak presiza serbisu hamutuk la’ós de’it ho governu Japaun maibé ho governu Xina, Estadu Unidu, Austrália no selseluk tan.

“Entaun ami ko’alia katak komunikasaun presiza kontinua, posibilidade kooperasaun iha área komunikasaun sosiál ne’e barak i sira mós presiza duni katak presiza komunika saida mak ita bele haree hamutuk,” dehan Sekretáriu Estadu, Merício dos Reis “Akara”.

Nia haktuir katak em termos hadi’a RTTL ne’e, parseiru ne’e interese duni atu apoia. “Ha’u dehan duni ba sira katak governu mós iha commitment forte atu hadi’a duni media estadu nian hanesan Ajénsia TATOLI, Rádiu Komunitária nomós kooperasaun di’ak ho Konsellu Imprensa no media enjerál. Maizmenus ida ne’e mak ami ko’alia i sira commitment, iha interese atu kontinua kolabora ho ita,” informa Sekretáriu Estadu Merício “Akara”.

Iha parte seluk, governante ne’e informa katak iha sorumutu ne’e, nia aprezenta mós oinsa JICA bele tulun governu bele haree sistema e-government ka governu elektrónika, tanba sira iha esperiénsia.

“Ne’e mós parte ida ita presiza dijitaliza. Ne’ebé, asuntu sira ne’e hotu ami ko’alia i to’o iha konkluzaun ida katak komunikasaun presiza kontinua. Governu prontu atu ko’alia ho parseiru dezenvolvimentu sira seluk i depende ita kolabora iha parte ne’ebé?,” realsa sekretáriu estadu ne’e

“Sira mensiona katak ideia di’ak, tanba parseiru dezenvolvimentu nian labele halo buat hotu, karik bele suporta iha parte balun i parseiru dezenvolvimentu sira seluk apoia iha parte seluk i governu nu’udar na’in ba projetu sira sempre prontu no hola parte di’ak liu se iha kolaborasaun,” nia reforsa.

Sekretáriu Estadu Komunikasaun Sosiál, Merício dos Reis “Akara” informa mós katak hahú fulan ne’e, maizmenus 27, 28 ba leten, iha ona duni ekipa atu halo avaliasaun kle’an iha RTTL.

“Espera iha semana rua ka tolu nia laran, sira bele fó rezultadu serbisu mai ita para depois publikamente ita bele anunsia katak serbisu apoiu RTTL ho ita-nia parseiru ne’ebé mak koordena hela serbisu ho ita, públiku hahú bele hatene katak prosesu serbisu la’o,” nia espera.

Nia esplika, importante mak ita-nia governu, dezde governu anteriór kedas, ita halo pedidu ba governu Xina atu apoiu RTTL liliu dijitalizasaun sistema, Mou (Momemorandum of Understanding) ne’e asina ona entre Ministériu Negósiu Estranjeiru  no Kooperasau Timor-Leste ho governu Xina; prosesu la’o. Nia mai hanesan Sekretáriu Estadu Komunikasaun Sosiál atu atualiza prosesu sira ne’e.

“Ita hatene iha interese husi ita-nia parseiru seluk, ita sei koordena malu para fahe kna’ar ba malu. Ita koko koordena. Em princípio ha’u follow up hela saida mak governu anterior halo, asina hoi ta-nia parseiru dezenvolvimentu sira,” nia konfirma.

Prioridade SEKOMS ba Media Privadu

Sekretáriu Estadu Merício “Akara” informa katak SEKOMS hahú ona dezenvolve komunikasaun ba media hothotu ho media na’in sira liuhusi vizita direta, enkontru no diskusaun hodi to’o iha konkluzaun ida katak presiza apoiu tanba media nia papel importante ba demokratizasaun iha ita-nia rain.

Media privadu sira mós importante ba dezenvolve komunikasaun entre estadu no povu tanba ne’e SEKOMS sei apoiu direta no indireta, bele  liuhusi formasaun ba rekursu umanu, liuhusi sai kliente no distribuisaun jornál sira.

“Ne’ebé, agora prosesu la’o. Klaru ona katak media hothotu enjerál sira hasoru kondisaun ida katak merkadu, konsumidór ne’e ki’ik. Ita bele dehan katak 70% ne’e depende ba estadu. Langanan sira ne’ebé iha, ita hanoin katak oinsa kontinua fó fiar malu para pilar importante ne’e forte nafatin; halo serbisu profisionál liutan i espera media na’in sira mós haka’as aan hadi’a infrastrutura,”nia esplika.

Sekretáriu Estadu Merício “Akara”  akresenta, ita hakarak ka lakohi, media privadu sira ne’e iha karakter komérsiu, entaun media na’in sira mós iha responsabilidade ba ida ne’e.

“Ami deskute barak. Maibé, sempre iha parseria, saida mak parte governu bele halo? Saida mak media na’in sira bele halo? Saida mak jornalista sira bele halo? I ami hanoin jornalista sira importante. Sira la iha, buat hotu la la’o; hanesan sira-nia ekipamentu, transporte inklui mais detallu, saláriu eh vensimentu. Ne’e hotu ita diskute, ita komunika i ita buka dalan hamutuk,” nia informa.

“Governu de’it labele, setór privadu de’it mós karik sei susar ka jornalista hakarak voluntáriu halo serbisu de’it mós bele hanoin dalarua, dala tolu. Entaun, esforsu husi parte hotu. Ne’ebé agora ita halo hela i agora ita iha faze komunika, halo monitorizasaun, saida mak sai pontus para ita bele koordena hamutuk, saida mak ita kontinua halo ketketak. Ne’ebé, depois 100 dias ne’e, ita iha klareza kona-ba ida ne’e,” nia hatutan.

Governante ne’e mós, iha biban ne’e, Maibé, dala ida tan, fó hatene ba públiku katak governu iha atensaun maka’as ba RTTL, públiku nian no espera iha tinan lima nia laran, iha mudansa balun.

“Governu sei la la’o mesak, ho ita-nia parseiru dezenvolvimentu sira hanesan governu Xina, Japaun, Autrália, Estadu Unidu, Portugal ita sei koopera,” informa sekretáriu estadu governu konstitusionál da-walu ne’e.

Pakote

Sekretáriu Estadu Komunikasaun Sosiál ne’e hateten, ita haree infrastrutura, ekipamentu, sistema la’o di’ak maibé estrutura, rekursu umanu mós tenke la’o di’ak. Ita haree pakote, saida mak di’ak ita mantein, saida mak presiza halo ajustamentu, halo mudansa, ita tenke pronto simu mudansa. Se rekursu umanu mak di’ak de’it, maibé ekipamentu, infrastrutura ladi’ak mós serbisu la maksimál.

“Se gedung di’ak, sistema sira di’ak, ema mak serbisu la dezenvolve ho di’ak, entau ne’e mós saugate de’it. Entaun, ami sei haree em pacote i haree mós lei. Ami sei ko’alia, liliu governu sei fó atensaun ba estatuta RTTL. Draft (esbosu) estatuta ne’e, ita prepara hela, espera iha fulan ida nia laran mai, bele aprezenta fali ba Konsellu Ministru atu haree, hadi’a dala ida,” nia dehan.

“Atu hadi’a buat ruma, presiza haree ba lei, estatuta. Ne’ebé hein oituan, bainhira draft lei, estatuta ne’e prontu ona, liliu se Konsellu Ministru aprova, Prezidente Repúblika aprova, entaun ita bele implementa,” hatutan Sekretáriu Estadu Merício “Akara”.

Nia reforsa katak kestaun RTLL ne’e SEKOMS haree pakote; infrastrutura, rekursu umanu, aspetu legál, regulamentu, administrasaun no finansa mós sei haree. Ita hakarak RTTL ne’e, empreza públiku ida ne’ebé mak transparante, iha kapasidade, fasilidade, ekipamentu di’ak ba oin.

Nia informa tan katak ko’alia tiha ona ho prezidente RTTL, Gil da Costa. Katak, RTTL empreza públiku tenke iha ona planu  negósiu (business plan) ruma para aban bainrua sai fali fonte rendimentu ba estadu.

“Agora ne’e governu fó, apoiu finanseiru tomak. Maibé, kuandu tama ona RTTL Ep, nia tenke hanoin katak nia tenke sai fali fonte rendimentu ba estadu. Klaru liu, bainhira estatuta RTTL ne’e klaru ona,” afirma Sekretáriu Estadu Merício “Akara”.

Se La Konsege Sai Fonte Rendimentu

Sekretáriu Estadu Komunikasaun Sosiál, Merício Juvinal dos Reis “Akara” akresenta governu sempre iha opsaun  no iha responsabilidade atu akompaña, tau-matan.

Maibé, mós tenke iha mehi hanesan katak se temi ona RTTL hanesan empreza públika, lójika ne’e katak sei sai fonte rendimentu ba estadu, lihusi publisidade ka programa saida de’it; pelumenus bele selu nia aan rasik. Ne’e lójika empreza.

“Maibé, estadu sempre tau-matan, haree, ne’ebé mak bele ona, iha parte ne’ebé mak seidauk bele, ita sempre koordena, i sempre la husik empreza públiku ida, naran monu de’it. Ita hahú la’o lai,” nia garante hodi konklui.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here