Ilustrasaun hosi google.

DILI, (TATOLI) – Komisaun Nasionál Kombate (KNK) HIV/SIDA tutela ona ba Ministériu Solidaridade Sosiál no Inkluzaun (MSSI) tuir orgánika governu da-ualu nian.

Vise Ministra Solidaridade Sosiál no Inkluzaun, Signi Chandrawati Verdial, hateten esbosu lei orgánika governu define komisaun ne’e tutela ba MSSI ne’ebé antes ne’e tutela iha Gabinete Primeiru-Ministru.

ʺAmi nia enkontru ne’e atu haree filafali servisu ne’ebé komisaun nasionál HIV-SIDA hala’o ona, tanba ne’e sekretáriu ezekutivu mai iha ne’e hodi halo esplikasaun atu halo kordenasaun servisu di’ak liutánʺ, haktuir nia hafoin enkontru ho Sekretáriu Ezekutivu, Daniel Marcal, ho ekipa iha salaun enkontru MSSI Kaikoli, ohin.

Vise Ministra hosi Partidu Libertasaun Populár (PLP) ne’e realsa planu asaun anuál komisaun nian ba prevensaun iha ona, tanba ne’e parte rua sei haree di’ak liután ba oin.

Komisaun ne’e independentemente jere rasik jestaun finanseira bazea ba dekretu lei númeru 13/2013, loron 27 fulan-novembru.

Komisaun ne’e iha ninia planu estrátejiku maka kombate HIV-SIDA, determina atu hamoris orgaun sira hodi koordena no jere programa multi-setorál hodi kombate.

Komisaun ne’e ho misaun koordena, fasilita, monitoriza no avalia resposta multi-setorál ba kombate HIV-SIDA.

Enkuantu ho  vizaun nu’udar fatór determinante hodi impede virus SIDA no suporta ema-infektadu no ema-afektadu HIV–SIDA, kontribui hadi’ak kualidade moris ema sira-nian no hamenus problema sosiál ne’ebé hamosu hosi epidemia ida-ne’e.

Entretantu, Sekretáriu Ezekutivu Komisaun Nasionál, Daniel Marçal, hateten planu prioridade komisaun nian ba 2018 maka prevensaun, finaliza nota entendementu entre komisaun TL ho Indonézia hodi halo prevensaun ba moras iha Fronteira no seluk tan.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here