Membru deputadu sira wainhira partisipa iha primeira plenaria legislatura Parlamentu Nasional Periodu 2018-2023. Dili 13 Juinu 2018.FOTO TATOLI

DILI, (TATOLI) – Bankada opozisaun FRETILIN liuhosi deklarasaun polítika konsidera Lei Fundu Petrolíferu no Lei Jestaun Finanseira ne’ebé tuir proposta VIII Governu Konstitusionál atu halo alterasaun la presiza, tanba lei hirak ne’e mai ho espíritu atu fó kbiit ba kualker governu.

“La presiza halo alterasaun ba Lei Fundu Petrolíferu no Lei Jestaun Finanseira, tanba lei hirak ne’e uluk halo ho espíritu atu fó kbiit ba kualker governu, hodi halo desizaun iha situasaun ne’ebé de’it hodi iha asesu ba osan atu asegura funsionamentu mákina estadu nian no fó prestasaun servisu ba povu nia interese”, tuir deklarasaun polítika ne’ebé lee husi Deputada Maria Angélica Rangel husi bankada FRETILIN iha plenária, ohin.

Hodi fó hanoin, VIII Governu Konstitusionál desde simu mandatu iha loron 22 juñu, dalan prátiku liu mak parte ezekutivu sira iha poder atu foti osan husi Fundu Petrolíferu ho de’it informasaun prévia ba Parlamentu Nasionál.

“Prosesu alterasaun lei Rejime Jestaun Finanseira ho Lei Fundu Petrolíferu sei haan tempu”.

Biban ne’e, nia mós klarifika katak VII Governu Konstitusonál momentu asume knaar, atua tuir dalan legais konstitusionais, tanba ne’e husu lalika halo espekulasaun katak governu anterior haksoit husi dalan legál.

Hodi esplika, tuir espíritu Lei Jestaun Finanseira artigu 31o kona-ba Rejime Doudesimál hateten momoos katak governu iha kompeténsia no deside autoriza jestór operasionál hanesan Ministériu Finansas no Banco Central Timor-Leste (BCTL) atu foti osan ho montante milliaun US$240, maibé governu anterior konsege foti de’it milliaun US$70.

“Ne’e duni lalika kestiona no hatun lian katak VII Governu Konstituisonál foti osan sem koñesimentu husi Parlamentu Nasionál. VII Governu Konstitusionál halo jestaun tuir prinsípiu lei rua ne’e hodi sustenta mákina estadu”, katak.

Parte seluk Deputada Fernanda Lay husi bankada CNRT deskorda ho deklarasaun bankada FRETILIN, tuir nia bainhira foti osan husi fundu futuru nasaun nian, bainhira laiha koñesimentu deputadu sira iha PN, la’os demokrátiku liu-liu ba governu ne’ebé programa mós laiha.

“Dotasaun temporária ne’ebé mensiona iha artigu 31o ne’e la’os osan, hodi nune’e tuir ami nia hanoin katak para foti osan husi fundu povu nian, povu tenke hatene liuhosi sira nian reprezentante iha Parlamentu ida ne’e”, tenik.

Entretantu, iha loron 11 jullu, VIII Governu Konstitusionál liuhosi reuniaun Konsellu Ministru husi aprova proposta lei atu husi autorizasaun espesiál atu bele transfere osan husi fundu petrolíferu ho montante milliaun US$140 atu sustenta mákina estadu durante fulan jullu no agostu.

Nune’e mós iha loron 13 jullu, desizaun reuniaun estraordinária Konsellu Ministru aprova alterasaun ezekuasaun rejime Duodesimál hodi bele lori proposta ne’e debate iha PN.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here