Reitór UNTL, Francisco Miguel Martins. Foto Tatoli/Egas Cristovão

HERA, (TATOLI) – Governu Japaun liuhusi projetu konstrusaun edifísiu foun Fakuldade Enjeñaria Siénsia no Teknolojia (FEST) Universidade Nasionál Timor Lorosa’e (UNTL) entrega ona ekipamentu laboratóriu hamutuk tipu 39.

Reitór UNTL, Francisco Miguel Martins, hatete materiál ne’ebé fó ba departamentu enjeñaria mekánika, enjeñaria elétrika no eletrónika nomós joelojia no petróleu.

“Doasaun ne’e husi Japaun no ohin ita halo serimónia entrega, ita simu ona, agora monta hotu ona iha fatin-fatin para ita-nia profesór, alunu sira kuandu iha interasaun teoria no prátika ne’e sira bele implementa sira-nia abilidade, potensialidade teoria ba prátika tanba enjeñaria labele enjeñaria istória, enejeñaria enjeñeiru tebetebes”, Farancisco katak iha FEST Hera, ohin.

Francisco hatutan mákina sira ne’ebé oferese ho nia kualidade aas no nivel internasionál nian. “Dosaun ida ne’ebé husi povu Japaun ba povu Timor-Leste liuhusi instituisaun ida ne’e atu eleva kualidade vida umana liuhusi edukasaun. Tanba ne’e ita fó importánsia tebes ba doasaun ida ne’e no fó obrigadu barak tebes”, tenik.

Reitór UNTL, Francisco Miguel Martins, ho konvidadu sira seluk haree besik apoiu ne’ebé Governu Japaun oferese ba UNTL. Foto Tatoli/Egas Cristovão

Materiál ne’ebé entrega ona ne’e ba edifísu sira ne’ebé iha, maibé ba instalasaun foun ne’ebé halo ona nia lansamentu fatuk dahuluk iha 20 fevereiru tinan ne’e no harii ho osan kuaze dólar millaun 22 ne’ebé sei remata iha jullu 2019, ekipamentu kompletu sei mai hodi tau ba departamentu hotu-hotu ne’ebé hamahan iha fakuldade ne’e.

“Profesór sira mós treinadu ona oinsá mak halo prátika ho estudante sira tuir sira-nia abilidade, potensialidade nomós profesionalizmu iha ida-idak nia área espesialidae”.

Dezde materiál ne’e monta iha semana tolu liubá ne’e espesialista mákina nian ne’ebé mai husi Japaun no Indonézia fó treina kedan ba pofesór sira.

Embaixadór Japaun, Hiroshi Minami, hatete Japaun apoia ona dalabarak iha prosesu konstrusaun Timor-Leste dezde 1999 liuhusi implementasaun projetu barak.

Embaixadór Japaun, Hiroshi Minami. Foto Tatoli/Egas Cristovão

“Entre projetu sira ne’e, ami-nia apoiu ba fakuldade enjeñaria UNTL mak kompromisu 99 nia ne’e mak iha 2001 ami-nia apoiu liuhusi projetu reabilitasaun urjente ba fakuldade ida ne’e”.

Aleinde ne’e iha 2018 Japaun lansa ona projetu seluk atu konstroe edifísiu foun ba FEST no konstrusaun ne’e sei remata iha tinan oin.

“Ami fiar importánsia iha edukasaun, edukasaun mak sai baze ba konstrusaun nasaun, edukasaun mak ferramenta poderoza atu empodera labarik sira. Ida ne’e mak razaun Timor-Leste fó prioridade aas ba edukasaun iha Planu Estratéjiku Dezenvolvimentu”.

Embaixadór ne’e hatutan dosente barak husi UNTL mak haruka ona bá Japaun no na’in-tolu hetan grau doutoradu na’in-14 mak akaba iha mestradu no dosente na’in-hitu seluk mak daudaun estuda hela iha país ne’e.

“Ha’u fiar sira sei serbisu ba país ne’e no ha’u-nia país sei kontinua fó apoiu dezenvolvimentu iha rekursu umanu”.

Nia kontinua hanesan sasin ba entrega ekipamentu husi povu Japaun ba FEST UNTL nu’udar parte ki’ikoan husi apoiu ba parte konstrusaun nasaun iha área siénsia no teknolojia iha Timor-Leste.

“Maibé ha’u sinseramente espera ami-nia apoiu sei kontinua iha futuru. Tinan 16 pasa ona dezde restaurasaun independénsia iha Timor-Leste, durante iha períodu ne’e demokrasia estabelese di’ak ona, maibé timoroan sei hasoru dezafiu dezenvolvimentu barak, espera katak talentu joven husi fakuldade ne’e sei ultrapasa dezafiu sira ne’e no alkansa dezenvolvimentu”.

Iha maiu 2017 reitór UNTL asiste iha konkursu públiku iha Japaun ne’ebé partisipa husi kompañia japonés sira no empreza husi Ogawa Seiki mak manán hodi fornese ekipamentu sira ba institusaun ne’e no asina kedan kontratu, nune’e iha 12 jullu 2018 entrga ona ekipamentu ba UNTL iha ámbitu projetu kontrusaun edifísu foun ne’ebé finansia husi Governu Japaun.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here