Komunidade haree besik kondisaun Bis Xiliax. Foto Tatoli/Agapito dos Santos

DILI, (TATOLI) – Asidente tránzitu Bis Xiliax ho diresaun Dili ba mai Ermera ne’ebé akontese iha área Sentru Formasaun Polísia Komoro, kuarta ne’e rezulta ema nain sia kanek kmaan.

Segundu Komandante Polísia Nasionál Timor-Leste (PNTL), Munísipiu Dili, Superintendente Asistente Polísia Euclides Belo, hateten pasajeiru sira ne’ebé hetan kanek  evakua kedas ba Ospitál Nasionál Guido Valadares hodi hetan tratamentu.

“Kondutór oras ne’e iha ona polísia munísipiu Dili hodi submete ba investigasaun. Enkuantu kazu ne’e akontese maizumenus tuku 7:00, la rezulta ema mate maibé kanek kmaan. Nain sia maka halo ona tratamentu saúdeʺ, haktuir Euclides ba jornalista sira iha Kaikoli, ohin.

Asidente ne’e akontese tanba bis ho númeru matrikula 35.594 soke kareta kiik kor mutin ho númeru matrikula 15.233 ne’ebé kondús hosi membru PNTL ida hodi tama ba área akademia polísia Komoro.

Kareta ho númeru matrikula 15.233 ne’e mak bainhira ses malu ho Bis Xiliax. Foto Tatoli/Agapito dos Santos

ʺKareta mutin ne’ebé kondús hosi membru PNTL ne’e mós submete hotu ba prosesu investigasaunʺ, realsa tan.

Eucledes Belo haktuir tan motivu loloos seidauk bele fó sai tanba sei iha prosesu investigasaun.

Entretantu, pasajeiru Francisca Abilio hateten tribulasaun ne’e akontese bainhira bis halai ho velosidade maka’as hosi diresaun Tasitolu ba Komoro, enkuantu auto-caro mutin ne’ebé kondús hosi membru PNTL ida tenta ultra-pasa ba área sentru Formasaun Akademia Polísia.

ʺHa’u trauma ho akontesemente ne’e, tanba derepente kareta baku filaʺ, konta ho triste.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here