Membru Parlamentu Nasional. Imajen/dok.TATOLI

DILI, (TATOLI) – Parlamentu Nasionál (PN), ohin fó votus pezar ba falecimentu antigu deputadu husi Assembleia Konstituante no lejislatura dahuluk, Armindo da Conceição Silva Freitas, ho votus unanimidade.

Armindo ho naran kódiku Tufão Leste, hakotu iis iha loron 9 fulan-jullu 2018 iha Dili ho idade 73. Nia moris iha Moro, Lautem loron 25 fulan-maiu 1945, oan husi Aleixo da Silva no Hermelinda da Silva.

Hafoin remata estudu iha 1991, Armindo serbisu iha administrasaun públika, iha sekretaria postu administrativu Moro, Lautem no servisu alfándega iha Lautem. Iha 1969, eleitu hanesan xefe suku parlamentu. 

Iha 1974, nomeadu husi partidu FRETILIN hanesan vise sekretáriu ba zona Moro, hafoin infazaun forsa Indonézia, Armindo ho ninia família desloka ba baze apóiu iha foho matebian no hela husi tinan 1976 to’o 1978 ho funsaun hanesan vise sekretáriu zona.

Durante okupasaun Indonézia, Armindo dezempeña papél determinante ida iha organizasaun rede klandestina no iha apóiu ne’ebé presta gerilleiru FALINTIL.

Iha 1980, hamutuk ho kompañeiru seluk atu monta rede klandestina ba ligadaun no apóiu rejiaun 1 Ponta Leste.

Iha 1986, nomeadu hanesan vise sekretáriu husi orgaun koordenadór rejionál rede klandestina Ponta Leste nian.

Hafoin referendu iha tinan 1999, outubru 2000, hetan nomeasaun hanesan koordenadór partidu FRETILIN ba rejiaun 1 Ponta Leste.

Nia mós hanesan deputadu Assembleia Konstituante ne’ebé eleitu husi partidu FRETILIN no partisipa iha aprovasaun Kostituisaun Repúblika Demokrátika Timor-Leste (RDTL) no deputadu ba PN durante lejislatura dahuluk husi tinan 2002 to’o 2007.

Iha 2006, hetan kondekorasaun medalla onra husi ordem saudozu Nicolau Lobato grau 1, tanba dedika án durante luta libertasaun Timor-Leste.

Tanba ne’e, membru PN espresa pezar ba falecimentu Armindo da Conceição Silva Freitas no aprezenta sentidu kondolénsia ba família lutada.

Tuir ajenda iha sesaun solene,mate isin sei lori ba plenária iha tuku 11 hodi deputadu sira bele presta homenajen ikus ba saudozu ne’e.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here