Foto/KFF.

DILI, (TATOLI)-Konservasaun Flora no Fauna (KFF) hamutuk ho kompañia Eto Moving Energy sensibiliza estudante Eskola Secundária Nobel da Paz no 5 de Maio sobre kestaun lixu ne’ebé daudaun akontese iha kapitál Dili ne’ebé bele halo redusaun ho maneira 4R.

Peskizadór KFF, Alito Rosa, hatete maneira 4R ne’e ko’alia kona-ba assuntu haat mak hanesan replace (troka), reduce (redús lixu), re-uza (uza filafali) no recycle.

Replace, muda ita-nia estilu moris hodi fó impaktu di’ak ba ambiente hanesan labele konsumu sasán sira ne’ebe bele hamosu lixu barak. Reduce lixu liuhusi maneira poupa utiliza sasán, ezemplu bainhira bá hola sasán ruma iha loja karik bele lori bote rasik hodi tau sasán, uza bee fatin rasik, lalika hola sasán ne’ebe aat lalais”, Alito dehan iha Kintál-Boot, horisehik.

Modu seluk mós re-uza nu’udar dalan ida hodi hamenus lixu liuhusi uza filafali fo’er hanesan kalén aat ka masa aat hodi kuda ai-funan ka modo, reutiliza hahán ka modo restu hodi fó han animál, uza botir hodi tau bee ka sasán seluk, uza fali suratahan ne’ebé sei mamuk no recycle mak halo sasán aat sai fali ida ne’ebe bele uza.

Aleinde informa estudante sira sobre problema fo’er, KFF no Eto mós sensibiliza importánsia husi floresta ai-parapa (mangrove) ba alunu sira atu hasa’e koñesimentu estudante nian para bele komprende mangrove nia importánsia, nune’e iha futuru bele halo konservasaun floresta ne’e ho di’ak tanba ida ne’e tipu floresta ida ne’ebé multi funsaun.

“Floresta mangrove tipu ai-horis ne’ebé bele satan laloran boot hodi prevene problema abrasaun ne’ebé kada tinan aumenta, satan anin boot hodi proteze komunidade iha área tasi ninin nomoós floresta mangrove sai fatin moris ba animál, tantu iha tasi no rai-maran”.

Ai-Parapa mós iha nia valór boot tebes ba setór turizmu liuliu ekoturizmu, maski iha Timor-Leste seidauk dezenvolve ekoturizmu mangrove, maibé  tenke proteje para futuru bele uza nia valór hirak ne’e ba sustentabildade moris ema no animál.

KFF no kompañia Eto tuir planu sei divulga kona-ba importánsia floresta ne’e no impaktu lixu ba ambiente ba eskola sekundária no ensinu báziku sira iha munisípiu Dili tomak, inklui postu administrativu Ataúru.

Jornalista : Maria Auxiliadora

Editór : Manuel Pinto

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here