Taur Matan Ruak ho naran kompletu José Maria de Vasconcelhos

DILI (TATOLI)-Taur Matan Ruak ho naran kompletu José Maria de Vasconcelhos moris iha loron 10 outubru 1956, iha suku Osso Huna, Postu Administrativu Baguia, Munisípiu Baucau, Timor-Leste.

Ajénsia TATOLI rekolla informasaun husi livru Taur Matan Ruak nian-Ser Livre É Ser Capaz De Dizer Não, katak bainhira Indonézia invade Timor-Leste iha loron 7 dezembru 1975 Taur Matan Ruak, iha tempu ne’ebá sei tinan 19, hamutuk kedas ho FALINTIL (Forças Armadas da Libertação Nacional Timor-Leste) iha foho.

Primeira nomeisaun Taur Matan Ruak akontese iha finál tinan 1976, hodi asume responsabilidade kresente iha setór militár leste nian rua: Setór Sentru Leste no Setór Ponta-Leste.

Durante tinan 1979 no 1980, Taur Matan Ruak simu orden hodi ezekuta asaun gerilla iha rejiaun leste. Taur hetan kapturasaun iha área Viqueque husi militár Indonéziu sira, iha loron 31 marsu 1979. Hafoin loron 23 kastigu, Taur konsege hala’i no halibur fila fali hamutuk ho FALINTIL sira iha foho.

Iha Marsu 1981, Taur Matan Ruak nomeadu nu’udar Kolaboradór Xefe Estadu-Maior das FALINTIL. No, iha tinan 1983, Taur transfere ba Komandu Operasionál Oeste (rejiaun hotu iha oeste eixu Baucau/Viqueque) no nomeadu nu’udar Konselleiru Militár no Subxefe Estadu-Maior das FALINTIL.

Hahú tinan 1986, Taur Matan Ruak asumi komandu iha operasaun militár sira nian hotu iha Timor-Leste. Tuir mai, bainhira bainhira Komandante-em-Xefe das FALINTIL, Xanana Gusmão hetan kaptura iha fulan novembru 1992, Taur Matan Ruak promove ba Xefe Estadu-Maior.

Alende kastigu iha Cipinang, Jakarta, Xanana Gusmão mantein funsaun Komandante-em-Xefe das FALINTIL no Nino Konis Santana asumi kargu nu’udar Vise-Komandante-em-Xefe das FALINTIL, hafoin kapturasaun Ma’Huno, iha loron 5 abril 1993, iha Manufahi.

Depois Nino Konis Santana mate, iha loron 11 marsu 1998, Taur Matan Ruak promove ba Vise-Komandante-em-Xefe das FALINTIL.

Iha fulan jullu 1999, FALINTIL konsentradu iha akantonamentu haat (Rejiaun I iha Atelari Postu Administrativu Laga, Munisípiu Baucau, Rejiaun II, III no Kuartel-Jenerál FALINTIL iha Uaimori, Munisípiu Viqueque no Rejiaun IV iha lokál rua ketaketak: Poetete, Munisípiu Ermera no Odelgomo, Munisípiu Bobonaro), no monu hikas ba Taur Matan Ruak nia responsabilidade hodi evita katak funu na’in armada FALINTIL karik envolve iha asaun kontra forsa Indonézia no pró-Indonézia sira.

Iha loron 30 agostu 1999, maioria povu Timor hili Indepedénsia, liuhusi referendu populár ne’ebé organiza husi Nasaun Unida sira.

Anúnsiu rezultadu referendu populár provoka onda violénsia perpetrada husi forsa Indonézia no pró-Indonézia sira, ne’ebé trava husi forsa intervensaun, Forsa Internasionál INTERFET, sansionada husi Organizasaun Nasaun Unida sira. Périodu ida ne’e teste desizivamente grau disiplina FALINTIL sira nian, tanba forsada ona hodi hela metin iha akantonamentu sira, enkuantu populasau evita sira-nia protesaun kontra investida devastadora sira no mortiféras husi forsa Indonézia no pró-Indonézia sira.

Iha loron 10 dezembru 1999, Taur Matan Ruak agrasiadu ho Prémiu Direitu Umanus Iha Asembleia Repúblika, iha Lisboa, Portugal. Iha loron 20 agostu 2000, Kay Rala Xanana Gusmão demite husi FALINTIL no Taur Matan Ruak nomeadu nu’udar Komandante-em-Xefe das FALINTIL.

Iha loron 1 fevereiru 2001, Taur Matan Ruak asume komandu FDTL-Força Defesa de Timor-Leste, ho patente Brigadeiru-Jenerál, iha serimónia preside husi Sérgio Viera de Mello, Adminitradór Tranzitóriu ONU nian.

Iha loron 20 maio 2002, iha loron restaurasaun indepedénsia nian, Taur Matan Ruak sai nu’udar Xefe Estadu-Maior-Jenerál das FALINTIL-Força de Defesa de Timor-Leste (F-FDTL).

Iha loron 7 dezembru 2006, Taur Matan Ruak kondekoradu husi Prezidente Repúblika Demokrátika Timor-Leste ho Ordem da Guerilha.

 Iha tinan 2007, Taur Matan Matan Ruak kondekoradu husi Prezidente Repúblika Demokrátika Timor-Leste tanba servisu ne’ebé nia hala’o durante Operasaun Halibur, operasaun konjunta F-FDTL ho Polísia Nasionál Timor-Leste (PNTL) hodi halo restabelesimentu seguransa no orden iha nasaun tanba kríze polítiku-militár 2006.

Iha loron 28 novembru 2009, Taur Matan Ruak promovidu ba Majór-Jenerál. Iha loron 20 agostu 2011, iha serimónia Omenajen Nasionál iha Agradesimentu no Rekoñesimentu nian ba eis-kombatente no libertasaun nasionál sira, Taur Matan Ruak ofisialmente dezmobilizadu husi FALINTIL no kondekoradu hamutuk ho eis-kombatente na’in 235 seluk.

Iha loron 6 outubru 2011, Taur Matan Ruak halo diskursu ikus nu’udar Xefe Estadu-Maior das F-FDTL, iha serimónia pasajen testemuñu komandu Forsa Defeza, hafoin ninia pedidu ezonerasaun ba kargu ne’ebé hetan aseitu husi Prezidente Repúblika.

Iha loron 16 abril 2012, Taur Matan Ruak eleitu ba Prezidente Repúblika Demokrátika Timor-Leste nian. Iha loron 23 abril 2012, Tribunál Rekursu proklama Taur Matan Ruak nu’udar Prezidente Repúblika Demokrátika Timor-Leste. Taur Matan Ruak toma pose iha loron 20 maiu 2012, no nia mandatu termina iha maiu 2017.

Informasaun seluk tuir mai, bainhira ba vida sívil, Taur Matan Ruak eleitu nu’udar Prezidente PLP (Partidu Libertasaun Populár) no konsege hetan asentu iha Parlamentu Nasionál. Hafoin impase polítika, Taur Matan Ruak sai portavóz ba koligasaun partidária AMP (Aliansa Mudansa ba Progresu) iha pré-eleitorál Antesipada, 2018.

Iha loron 22 juñu 2018, Taur Matan Ruak hetan pose husi Prezidente Repúblika Francisco Guterres, Lú-Olo, hodi sai nu’udar ezekutivu eh Primeiru-ministru ba périodu 2018-2023.

Taur Matan Ruak nia kaben mak Isabel da Costa Ferreira no iha oan feto na’in rua, Lola no Tamariza no oan mane ida, Quesadhip. Taur Matan Ruak ko’alia lian tolu Timor-Leste nian (tetun, naueti no makasae), portugés no ingles. Parabéns!

Jornalista: Rafy Belo

Editór : Manuel Pinto

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here