Brosura rejime foun kona-ba kontrolu Tabaku.

DILI, (TATOLI) – Fuma bele provoka kankru, asidente vaskulár (stroke), impoténsia, hipertensaun, tuberkuloze no seluk tan, tanba sigaru kontaminadu ho nikotina, alkatraun (tar) inklui kímiku balun tan.

“Ha’u-nia hanoin governu tenke hasai lei ida ne’ebé mak rigoroza hodi kontra tabagizmu”, hatete estudante Fakuldade Medisina, Siénsia no Saúde (FMSS) Departamentu Nutrisaun no Dietetika, Riberto Jomas dos Reis, iha entrevista ho Tatoli iha kampus Kaikoli, ohin.

Riberto konsidera fuma nu’udar epidemia ida iha Timor. Tan ne’e governu tenke hasa’e sigaru nia folin, bandu menoridade atu sosa sigaru, labele fuma iha repartisaun públika, inklui labele fa’an sigaru arbiru.

“Atu nune’e bele muda mentalidade hodi kontribui ba reduz númeru fuma iha ita-nia rain”, akresenta.

Tuir Riberto númeru konsumu tabaku iha nível mundiál aas, maioiria husi labarik ne’ebé mak adultu.

Tuir Organizasaun Mundiál Saúde (OMS), ne’ebé fó sai antes ne’e, Timor-Leste nu’udar nasaun iha sudeste-aziátiku populasaun adulta pursentu 56 mak fumadór. Númeru ne’e, maioria mane ho pursentu 71.

“Tuir hau-nia hanoin ne’e kauza tanba tabaku iha ita-nia rain fa’an ho folin ne’ebé baratu, iha ita-nia rain mós ema fa’an tabaku livre. Laiha lei ruma para bele fa’an tabaku tuir nia fatin, ema kontinua fuma iha fatin públiku sira. Entaun ne’e fó oportunidade ba ema hotu atu fuma, liuliu sira ne’ebé ho idade ki’ik”, katak tan.

Timor-Leste, antes ne’e mós, liuliu Komisaun Funsaun Públika (KFP), liuhusi desizaun CFP (sigla iha portugés) númeru 1508/ 2015, juñu, fó sai katak “Livre de Tabaco, Alcool e Palavrões no Recinto de Trabalho” eh tradusaun etimolojika katak labele fuma, hemu no tolok iha fatin serbisu.

Enkuantu, tuir estudante Fakuldade Siénsia Sosiál (FSS), Falentino Atana Bento katak tabaku hanesan produtu kímiku, fó risku tebes ba ema ne’ebé fuma. Tabaku bainhira fuma bele lori moras respiratóriu, fó risku ba pulmaun no fó impaktu ba kakutak. Kauza hosi substánsia kímiku ne’ebé mak kompoen iha sigaru.

Tuir OMS, nia dehan tabagizmu iha TL tanba edukasaun família no lei anti-tabaku. Inan-aman menus kontrolu ba oan sira, dalaruma iha família, balun aman fumadór hatoman sira-nia oan sira ho tabaku. Bainhira oan mós toman ona, ida ne’e susar atu hapara, nune’e rezulta taxa fuma nian mós aumenta.

Segundu, mak lei seidauk forsa hodi atende fumadór. Bainhira lei iha, la’o la loos, ida ne’e fó impaktu tebes ba estudante no funsionáriu eh seluk tan ne’ebé mak konsumu tabaku.

“Ba maluk foinsa’e sira hotu ne’ebé mak fuma, ha’u atu dehan de’it katak di’ak liu prevene duke kura. Hapara kedas agora duke loron ikus sigaru mak hapara fali imi-nia moris. Sente ba araska para, entaun bele hamenus”, katak.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here