Xefe Estadu Maior FALINTIL–Forsa Defeza Timor-Leste (F-FDTL), Majór Jenerál Lere Anan Timur, bainhira hatan jornalista sira iha Palásiu Prezidente Nicolau Lobato Bairo Pité. Foto mídia PR.

DILI, (TATOLI) – Estadu Timor-Leste sei promove koronel na’in haat hosi FALINTIL-Forsa Defeza Timor-Leste (F-FDTL) ba brigadeiru jenerál iha loron 7 fulan-juñu 2018.

“Promosaun halo hanesan baibain ne’ebé sei organiza hosi Kaza Militár Prezidénsia Repúblika. Ita la halo seremónia ida boot”, Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur, ba jornalista sira iha Palásiu Prezidente Nicolau Lobato, Bairru Pité, kuarta ne’e.

Lere esplika koronél na’in haat sei ba lidera instituisaun apoiu serbisu iha F-FDTL nia laran maka hanesan Autoridade Marítima, Gabinete Krize, Institutu Defeza no Inspesaun Jerál.

Majór Jenerál hatutan prosesu promove koronél hirak ne’e defisil maibé atribui serbisu ne’e la defisil, maske nune’e atu ezekuta serbisu mós tenke fera ulun, tanba hotu-hotu foun entaun tenke iha inisiativa no asesór di’ak.

Koronél na’in haat ne’ebé atu simu promosaun maka João Miranda “Aluc”, Américo Ximenes “Sabica”, Cornélio Ximenes “Maunana” no Domingos Raul “Falur Rate Laek”.

Entretantu, Prezidente Repúblika, Francisco Guterres Lú Olo, dekreta ona data promosaun refere.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here