Eis Primeiru Ministru Kay Rala Xanana Gusmão.
DILI (TATOLI)—Eis Primeiru Ministru Kay Rala Xanana Gusmão, rekoñese iha Tribunál Munisípiu Dili, ohin (Tersa-red) katak nia (Xanana) mak autoriza atu Eis-Ministru Obras Públika, Gastão de Sousa rai karreta ne’ebé ADB ajuda ba ministériu iha uma, maibé la’ós pertense ba Gastão.

“Kona-bá karreta ne’ebé mai hosi ADB (Asian Development Bank) mak ho ha’u nia autorizasaun hela ho nia (Gastão), hela ho nia la’ós pertense ba nia, ne’e la’e. hela ho nia hodi sai hanesan karreta rezerva,” Kay Rala Xanana Gusmão informa ba Jornalista sira hafoin fó sasin ba Tribunál Munisípiu Dili, Ohin.
“Sai karreta rezerva hodi ami bele uza iha situasaun emerjénsia ruma, iha loron Sábadu no Domingu hodi ba haree projetu. Karreta ne’e ida mak hela ho nia.”
Xanana mós rekoñese nia erru tanba bainhira autoriza karreta ida hela ho Gastão de Sousa ho kondisaun uza matríkula privadu.
Arguido, Gastão Sousa, Eis-Ministru Obras Publiku.
Gastão de Sousa sai arguidu hamutuk ho nia oan mane na’in rua, Jordão Maria de Jesus da Silva Sousa, Ferlio Afonso Bado Loi da Silva Sousa, tuir akuzasaun ministériu públiku akuza no rekere julgamentu iha prosesu komún bazeia ba artigu 236 no 48 no 2, alínea d, kódigu prosesu penal.
Gastão ho nia oan mane na’in rua inklui Diogo da Costa, funsionáriu Obras Públiku, ho Padre Martinho Gusmão, relasiona ho viatura 8 ne’ebé ADB fó governu Timor-Leste, bazeia ba kontratu ne’ebé Governu ho ADB asina 28, Fevereiru, 2010.
Entre karreta 8 ne’ebé mak iha, deskonfia eis-ministru Gastão de Sousa, la fó koñesimentu ba departamentu lojístika Ministériu nian, maibé nia entrega ida mark Toyota, Kijang Innova ho númeru matríkula 19-754 TLS ba arguidu Diogo da Costa, hanesan Xefe gabinete.
Karreta seluk ho marka land cruiser v8, Toyota rav 4, no Toyota land cruiser prado, uza hotu matríkula privadu, ikus mai karreta ida ho matríkula 18-948 TLS hela ho Gastão rasik iha nia uma, nune’e arguidu Jordão Maria de Jesus da Silva Sousa, no Ferlio Afonso Bado Loi da Silva Sousa, hanesan oan mane ba Gastão uza ba nia privadu.
Gastão de Sousa hetan akuzasaun hosi Ministériu Públiku ho krime pekulatu  kontra artigu 295 no 1 ho 3 ba autór matéria ho arguidu Diago da Silva.
Enkuantu Jordão Maria de Jesus da Silva Sousa, no Ferlio Afonso Bado Loi da Silva Sousa akuza ho krime administrasaun danoza kontra artigu 274, no 2 ho 3 ba kumplisidade ho arguidu Martinho Gusmão.
Arguidu na’in rua (Jordão Maria de Jesus da Silva Sousa, no Ferlio Afonso Bado Loi da Silva Sousa) komete iha co-autoria matéria ne’ebé Ministériu Públiku akuza ho krime pekulatu kontra artigu 295, no 1,41 no 34 ba autór material ho arguidu Gastão de Sousa.
Audiénsia julgamentu ne’e prezide hosi juis koletivu, juiza Albertina Neves, Juiza Zumiaty Freitas ho Juiz Antonio do Carmo, Ministériu Públiku reprezenta  hosi Prokuradóra Lidia Soares ho Jasinto Babo.
Julgamentu adia tan ba loron, 26 fulan oin, iha tuku 4H00 hodi rona tan testemuña hosi Bispu Dioseze Baukau, Basílio do Nascimento, ne’ebé submete ba tribunál ho eskrita.
Antes ne’e, iha loron, 6/10/2017, Tribunál adia julgamentu tanba arguidu Gastão ho nia oan mane na’in rua la marka prezensa iha Tribunál.
 (Ekipa Kobertura)

HAKEREK NO HATÁN

Please enter your comment!
Please enter your name here