Desizaun Tribunál Rekursu ba Partidu Fretilín nian, rekursu.

DILI (TATOLI)—Tribunál Rekursu (TR) liuhosi desizaun koletivu juis sira nian, ohin, deside rejeita Rekursu Partidu Fretilín nia, relasiona ho Partidu Fretilín nia insatisfasaun ba realizasaun Eleisaun Antisipada Parlamentár (EAP), foin lalais ne’e.

Enkuantu TR mós promete mais tarde iha loron Segunda semana ne’e sei anunsia rezultadu EAP.

Rekursu partidu Fretilín ne’e deside hosi juis Deolindo dos Santos, Gulhermino da Silva, no Maria Natércia Gusmão, iha loron 23, Maiu, 2018. Tanba iha loron tolu liu ba Komisaun Nasionál Eleisaun (CNE-sigla Portugés) submete ba TR Partidu Fretilín nia rekursu hamutuk rezultadu apuramentu nasionál.

Iha rekursu ne’e Fretilín deskonfia iha manipulasaun, la iha transparénsia ba realizasaun eleisaun Antisipada parlamentár foin lalais ne’e, espesiálmente iha Oekusi no sentru votasaun balun iha munisípiu sira Timor-Leste nian.

Prezidente Tribunál Rekursu, Deolindo dos Santos, bainhira fó sai númeru sorteiu partidu polítiku ne’ebé sei konkore iha eleisaun antesipada iha Kaikoli. Foto Tatoli/Egas Cristovão

“Rekursu hosi partidu Fretilín nian ohin desizaun sai ona. Kona ba konteúdu desizaun ha’u la bele esplika,”  Prezidente Tribunál Rekursu, Deolindo dos Santos informa ba jornalista sira iha nia knaar fatin, Kaikoli, ohin.

“Rekursu Partidu Fretilín la liu ida, ohin ami deside ona. Agora hela ne’e, hein proklamasaun rezultadu. Iha buat rua mak la hanesan, ida mai hosi konkorrente sira nian (Partidu Fretilín) nia kazu ne’e rekursu, no ida seluk desizaun ba proklamasaun eleisaun nian.”

Hatán kona ba rezultadu eleisaun antisipada parlamentár nia dehan, másimu iha loron segunda (28/05) iha ona desizaun ofisial, maibé nia rejeita antisipadamente ko’alia katak iha ka lae oportunidade ba Fretilín hodi halo rekursu estraordináriu tanba la satisfás ho desizaun ne’ebé mak TR foti ona hasoru rekursu hosi Fretilín nian.

Tribunal tuir lei hatete, deside uluk rekursu hosi Fretilín hafoin iha 72 oras nia laran estuda no analiza hodi halo proklamasaun ba rezultadu eleisaun, tanba ne’e prazu ba proklamasaun rezultadu eleisaun seidauk liu.

“Ida seluk ne’e prazu hotu ona no deside ona, no ida seluk prazu sei la’o hela. Mais kleur liu ne’e, Segunda feira desizaun tenke sai, la bele muda,” Deolindo esplika.

(ekipa kobertura)  

HAKEREK NO HATÁN

Please enter your comment!
Please enter your name here