Estrutura no AAED-FMSS UNTL konversa ho Doutór Daniel Murphy. Foto: Atanásio da Costa Flores

DILI, (TATOLI) – Fakuldade Medisina, Siénsia no Saúde (FMSS), Universidade Nasionál Timor Lorosa’e (UNTL), liuhusi Asosiasaun Akadémiku Estudantil (AAE) no estrutura FMSS fó apoiu solidariedade ho valór osan dolár 400 ba Klínika Bairru Pité.

“Komisaun organizadora halo kontribuisaun mai husi estudante no dosente FMSS, hetan osan hamutuk dolár 400. Objetivu atividade mak orienta estudante sira hala’o karidade ba kbiit laek sira ne’ebé asesu klínika refere hanesan papel universitáriu nian. Tanba klínika refere hetan hela krize finanseiru”, hatete koordenadór primeiru-sokoru AAE-FMSS, Atanásio da Costa Flores, ba TATOLI iha Kampus FMSS Kaikoli, ohin.

Atanásio haktuir FMSS fó apoiu tanba dr. Daniel Murphy hahú serbisu iha Timor-Leste iha 1998 no altura ne’ebá la iha ema ajuda timoroan sira halo tratamentu moras. Iha de’it mak médiku sira mai husi Kuba depois restaurasaun indepedénsia.

Doutór Daniel dehan hadomi ema moras sira tanba ne’e hakarak dedika aan ba kbiit laek sira no agradese estrutura no senadu FMSS-UNTL ne’ebé mak laran fó luak apoiu.

Koordenadór primeiru-sokoru, Atanásio da Costa Flores akresenta, solidaridade ne’e nu’udar responsável morál, nu’udar povu no sidadaun.

“Hanesan estudante Fakuldade Medisina, Siénsia no Saúde no sidadaun sempre besik liu ba moras sira, no ema moras sira la’ós presiza de’it doutór, enfermeiru no parteira maibé presiza ita hotu nia tulun liuhusi meiu saida de’it hanesan osan, materiál báziku (hahan, hemun no sabaun) hodi minimiza sira-nia sofrimentu”, estudante enfermajen ne’e fó hanoin.

Entretantu, atividade ne’ebé AAE-FMSS realiza hodi fó apoiu solidariedade ne’e, nu’udar programa amizade (bina akrab) entre estudante tuan no foun iha tinan létivu 2018.

Programa amizade ne’ebé planeadu mak hanesan atividade líturjika (viasakra, konfesa no misa), asaun karidade ajuda klínika Bairru Pité, ohin realiza ona. Inklui, atividade rua seluk ne’ebé seidauk realiza mak ajuda ema kbiit laek eh vulnerável no festeja hamutuk entre estudante (tuir planu sei realiza iha 26 maiu 2018).

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here